MAS mikusog ang hangin nga habagat nga nasinatian ning panahona ilabi na nga dunay mga pagdaut sa panahon sa nasud.
Gumikan niini, kadagatan nakasinati og di lang mga kusog nga hangin, apan lakip na sab mga dagkong balud. Timailhan kini nga di maayong mobiyahe, managat ug mangaligo sa dagat.
Ubang dapit, ang habagat nagdala og kusog nga ulan ug miresulta sa pagbaha hinungdan nga pipila ka mga klase gisuspende.
Didto sa Iloilo City, daghang mga pasahero ang na-stranded sa mga pantalan tungod kay gihunong una ang biyahe sa mga sakyanang pangdagat tungod sa kusog nga mga balud.
Samtang niadtong Dominggo, nangaguba ang pipila ka mga balay ug mga cottages sa baybayon daplin sa Libuganon sa siyudad sa Tagum tungod sa
mga dagkong balud.
Didto sa Davao del Sur, usa ka hamtong ug laing menor de edad ang nalumos patay human gianod sa dagkung mga balud sa dagat samtang nangaligo niadtong Dominggo.
Di maayo ang epekto sa habagat gumikan kay nagdala kini og kadaut sa propedad ug labaw sa tanan ang pagkakalas sa kinabuhi.
Busa ang mga panghitabo sa palibot, pahimangno kanato nga kanunay nga mag-amping ug temporaryo unang mobalhin, ilabi na kadtong namuyo
daplin sa baybayon kay delikado ang panahon alang kanato.
Di matagna ang panghitabo sama niining panahona nga gikonsidera natong lihok sa kinaiyahan. Apan mahimo nato kining malikayan kon mag-amping kita sa atong kaugalingon ug maminaw sa mga pahimangno sa mga awtoridad, ilabi na sa mga opisyal sa atong lokal nga kagamhanan.
Di kita angay nga magmagahi, kay alang man kini sa atong kaayohan ug kaluwasan.