NEW BATAAN, ComVal Province -- Patay na dihang nabangalan ang usa ka empleyado sa gobyerno sa Purok 2, Barangay Batinao, alas 9:30 sa buntag, Lunes, Hulyo 16, 2018.
Patay'ng lawas giila nga si Ceferino Legaspina, 36, empleyado sa Provincial Government of Compostela Valley, nagpuyo sa Purok 3B, Barangay Cabinuangan, New Bataan sa probinsiya.
Segun sa taho sa Compostela Valley Police Provincial Office nga nakadawat og tawag gikan sa Department of Interior and Local Government Office - New Bataan ang New Bataan Municipal Police Station kinsa nagpahibalo kalabot sa patay'ng lawas nga nabangalan kilid sa provincial road.
Gilayong miresponde ang kapulisan ug naglusad og imbestigasyon ug nasayran nga usa ka Selverio Albios, 59, ang nakakita sa biktima nga nagbuy-od kilid sa Rouser 150 nga motorsiklo.
Dihang gihiling ang patay'ng lawas niini, walay nakitang timailhan ang mga imbestigador nga gituyo pagpatay ang biktima.
Patay'ng lawas sa biktima gidala ngadto sa Funeraria De Alar sa Poblacion, Compostela alang sa post mortem exam aron matino ang hinungdan sa iyang kamatayon. (Rockyben S. Catisay)