SECTIONS
Friday, October 19, 2018

15 na patay sa 'Oplan Tugis'

MOKABAT na sa 15 ang napatay sa kapulisan sa Davao City Police Office (DCPO) sukad namugna ang Oplan: R.A.T Tugis (Rubbery/Hold-up, Akyat-Bahay and Theft) niadtong Hunyo 11, 2018.

Ang maong ihap subay sa talaan sa SunStar SuperBalita Davao gikan sa pagpakusog sa kampanya sa pagbatok sa kriminalidad ning siyudad.

Sumala ni DCPO director Senior Supt. Alexander Tagum nga usa kini ka gipakusgang programa sa pagdakop sa mga wanted persons ug sa mga drug pushers, apan mapatay sila kung mabutang sa alanganin ang kinabuhi sa pulis diha sa operasyon.

Ulahing napatay mao si Ernest Hector Perucho Sayad, 28, traysikel driver, ug residente sa Purok 3-A, Brgy. 23-C, Isla Verde kinsa misukol sa kapulisan sa Sta. Ana Police Station atol sa drug bust alas 11:30 sa gabii niadtong Lunes sa Isla Verde, Boulevard.

Sumala sa spot report sa Sta. Ana PNP, dihang namatikdan sa suspek nga mga pulis ang mipalit kaniya, mibunlot kini sa iyang .38 nga pistola.

Giingong gipamusil sa suspek ang mga pulis hinungdan nga napugos ang mga pulis nga i-niyutralisa kini.

Patay na nga miabot sa ospital ang suspek diin nakuha sa posisyon sa suspek ang tulo ka pakite sa gituohang shabu ingon man ang P500 nga marked money.

Chief Inspector Michael Uyanguren, ang hepe sa Sta. Ana PNP, nagbutyag nga mapugos sila sa pag-niyutralisa sa suspek kung mabutang na gayod sa alanganin ang kinabuhi sa pulis.


VIEW COMMENTS