PARA nako atong pasalamatan ang nahitabong panag-away kanila ni Cebu City Mayor Tomas Osmeña, ug Land Transporation Office ( LTO 7 ) Director Victor Caindec.
Tungod sa ilang away nabulgar ug nahibaw-an sa katawhan ang tagsa tagsa nila ka mga bulilyaso.
Gibulgar ni Tomas ang liboan ka pending nga mga rehistro sa mga sakyanan ubos sa liderato ni Caindec.
Samtang napakyas si Osmeña sa pagsulbad sa problema sa trapiko sa Basak sa Natalio Bacalso Avenue tungod sa wa pa mahuman nga subway sa maong lugar.
Kon atong lili-on, daghan pa kini sila og bulilyaso. Hinuon mahimong makurihian aron molambo pa ang ilang trabaho.
Pero sa problema sa trapiko gikinahanglan nga magtinabangay ang mayor ug ang director. Usa kini sa dakong problema sa siyudad ug sa mga silingang lungsod.
Mao gani mipadayag sa iyang pagpatunga si Arsobispo Jose Palma Palma sa simbahang Katoliko.
Gusto ni Palma nga malandagan ang hunahuna sa duha ka mga opisyal nga unahon pagtagad ang interes sa katawhan.
Samtang bisan paman og dunay mga nahimo si Osmeña, dili angay mokompyansa si Caindec.
Ang mayor maginukdanon bisan paman masakprisyo ang panginahanglan sa katawhan. Kuhaan og garbage truck ug ambulansya ang barangay nga di kaalyado.
Usa ka butang nga dili maayo! Ug naa nasab untay kausaban nganong iapil man sa away ang way labot nga katawhan.
Kadaugan ni Pacquiao kuwestyonabli?
Sa akong pag-review sa mga away ni Manny Pacquiao, kombinsido ko sa iyang kadaugan kay nakog binakbakay ang kontra mao mangatumba.
Apan pasayloa ko sa away ni Paquiao ug Matthysse, way klaro nga nagbinokbokay ang duha sa ibabaw sa ring.
Kon atong tuohan ang mga pagduda nga scripted ang away, dunay posibilidad. Mao nga way gana mitan-aw kay dili halinon ang away ug morag gipanghatag nalang ang tiket.
Kini gituyo ba aron ang kadaugan ni Pacman maoy sukaranan nga makontra niya pagbalik si Floyd Mayweather o kaha si Juan Manuel Marquez aron mokita og dako, magamit ang kuwarta sa pangandoy nga mag bise presidente sa 2022 nga presidential elections?
Naa man ko ni Manny. Gawas nga Pinoy ako, akong kaliwat taga General Santos City.
Apan di sab nato isalikway nga daghan ang wa malingaw niadtong awaya kay maorag gisabot na daan.
(Email: efrenlonzon77@gmail .com Text: 09235562777)