DAGHAN ang tuyo sa panagbangi. Apan duha ra ang matang niini kini mao ang bati ug ang maayo. Ang maayong panagbangi mopatumaw sa kamatuoran samtang ang bati di makaayo sa tawo ug katilingban.
Kini karong panagbangi nilang LTO Regional Director Victor Caindec maoy pananglitan sa bati kay makadaot sa katawhan labi na sa suliran sa trapiko. Mosamot kahuot ang trapiko labi na diha sa Mambaling.
Unta magtinabangay sila, di kay garbo ang palihukon. Mailhan ang gimok sa pulitika dinhi. Kini si Caindec kuno tawo ni Rama kaniadto nga natudlo karon nga LTO director.
Matod pa, sa panabang kuno ni Michael Dino, ang Presidential Asst. sa Visayas. Ambot, kon tinuod ba ni. Kon tinuod, may dakong purohan nga ang bangi may bulok pulitika.
Nahinumdom ko nga kaniadto adunay grupo o asosasyon ang mga regional director nga ginganlag ARENA 7 (Association of Regional Executives of National Agencies of Region 7)
Ang tuyo mao ang pakigtambayayong sa mga LGU’s sa mga kalihukan nga makaayo sa katawhan. Morag wa na ning grupo karon kon existing pa hayan dormant na kini.
Nahibawo ko niini kay dihay director sa among ahensiya nga itangkil ko kanunay sa mga miting sa ARENA 7. Ang mga director niadto magpakita kanunay sa ilang kooperasyon sa mayor.
Way panagbingkil nga mahitabo kay masinabuton sila sa mga antic ug pet peeve sa mga pulitiko. Kasagaran nila di non-conformists. Kay gipatumaw ang pagtinahuray, naa kanunay sa path of least resistance.
Di sad ko motuo nga sila nagpataasay sa ihi. Kay ang matag usa nahibawo sa ilang mga katungdanan. Labi na sa mga director kay specific ang ilang function. Samtang sa mga mayor lapad ang ila kay nahinungod man sa kaayuhan sa tanan.
Nagkagrabe ang ilang binanatay. Gani magkatawa tang maghunahuna nilang duha. Nag-set og sila og kondisyon nga di mahimo nilang duha.
Ning tanan, ang katawhan ang makahukom. Angay bantayan sa mayor nga siya dihado kay elected opisyal siya. Kon mapiit ang tawo sa bangi may mga botos nga mangawa.or.