NITUMAW ang isyu karon kinsa ang kinahanglan mag-una sa suliran sa trapiko, ang local government unit (LGU) ba o ang Land Transportation Office (LTO).
Kini human sa binayloay og mga pamahayag ug social media posts nila ni Cebu City Mayor Tomas Osmeña ug LTO Regional Director Victor Emmanuel Caindec kalabot sa suliran sa trapiko sa Mambaling.
Niadtong Lunes wa butangi ni Osmeña og traffic enforcer ang mao nga dapit hinungdan nga ang mga pulis ug pipila ka mga kawani sa usa ka mall ang nagpadagan sa trapiko.
Apan matod ni Caindec nga gimbuhaton sa usa ka local government unit (LGU) ang pagdumala sa trapiko ubos sa iyang hurisdiksyon.
Di na angay pang lalisan kon kinsa man ang primary nga responsibilidad ang pagdumala sa trapiko kay iya kini sa local government unit. Naa bay LTO office sa bisan asa nga siyudad o lungsod nga maoy nagdumala?
Bisan asa nga lugar nga dunay road work o construction, naa kanunay ang paghuot sa trapiko. Mao ni ang nahitabo sa dakbayan sa Mandaue pipila ka mga tuig ang nakalabay. Langas kaayo ang social media labot sa grabeng kahuot sa trapiko sa Mandaue. Nahilom pagkahuman sa mga proyekto.
Nipuli ang Mambaling human sirhi ang portion sa N. Bacalso tungod sa pagtrabaho sa underpass.
Nisamot ang kalangas bag-ohay lang tungod sa pagbinayloay og mga pamahayag nila ni Caindec ug Osmeña, kalabot sa suliran sa trapiko sa mao nga dapit.
Bisan unsa pay ilang buhaton, way sulbad ang mao nga suliran hangtod nga mahuman ang proyekto. Di traffic mismanagement ang nakaingon niini.
Ang hinungdan mao ang proyekto nga gisuportahan ni Osmeña. Busa, bisan asa nilang duha, way makasulbad. Mas maayo pang mohilom sila kay way padulngan ang ilang lalis.