MOTOO ka ba og “Love at First Sight”? Love moves in mysterious ways? Love is not about how long you’ve been together; it’s how you both enjoy your moments with each other? o sa gugma nga ga uros-uros?
Well, kining tanan alang sa 28 anyos nga si Gregorio Angeles III nga kung kamo gyud ang gitakda alang sa usag-usa makurat ka nalang sa mga mahitabo ilabi na kung ang gugma na ang molihok.
“Dili man tuyo ma trending, ako lang ma surprise nako siya, ipakita akong gugma nga ga uros-uros, nagdali ko makakita pa lang siya og lain.”
Kini ang gibutyag ni Angeles kinsa nag-propose sa intersection sa C.M Recto ubos sa flyover ning siyudad sa Cagayan de Oro.
Niani og daghan nga komento ug reaksiyon ang 35 segundo nga video ug gani nabalita usab kini sa TV station sa pagsorpresa niini sa hinigugma sa dihang gi-upload sa kauban ra usab nga enforcer ang maong video.
Giingong gipahatod niini og snacks ang girlfriend kay lage birthday man usab niini niadtong Hunyo 15, 2018.
“Gipahatod sa snacks kay birthday man nako to, five months pa, don’t count the year count the beat?” ang malipayong pagpadayag niini.
Gidugang pa nga mingaw ang kadalanan atol niadtong panahona kay gawas nga udtong tutok holiday usab.
Giangkon niini nga naulaw siya ug nakulbaan sa gihimo gumikan kay ubay-ubay usab ang nakakita apan andam niini nga balewalaon ang tanan aron lamang nga masorpresa ug mapakita sa hinigugma nga tinud-anay ang pagbati niini ug buot niini nga makauban ang dalaga sa tibuok kinabuhi.
Kinsa ang magdahom nga sulod sa unom ka bulan diha sa kadalanan isip usa ka traffic enforcer, sa dalan ra usab maila niini ang babaye nga nagpapitik sa iyang dughan ug gustong makauban sa tibuok nga kinabuhi.
Nagka-ila ang duha human nga nakalapas sa bala-od sa trapiko si Vienna Mureen Banaag ug didto napamatud-an ni Angeles nga tinuod ang “Love at First sight” tungod kay iya matud kining gibati sa dihang unang nakita ang dalaga.
“Nag-ila ra pud mi sa dalan kay violator man siya, akong kauban nakadakop ako lang nagtabang og bayad, iyang ig-agaw akong barkada mao nagpatabang sila, na love at first sight ko” ang mapahiyumong pahayag ni Angeles.
Plano niining himuon ang kasal sa sunod tuig dinhi sa siyudad sa Cagayan de Oro.