DUHA ka mga sakop sa New People’s Army (NPA) ang nibalik sa sabakan sa gobyerno niadtong Biyernes, July 13 sa lungsod sa Impasug-ong, Bukidnon.
Mga alas 9 sa buntag usa ka alyas Sander, 20 anyos, ug miyembro sa Squad 3 peddler, Sub-Regional Committee 2 (SRC2), North Central Mindanao Regional Command (NCMRC) ang mitahan sa US Springfield rifle.
Alas 4 sa hapon usa ka alyas Jems, 20 anyos ug miyembro sa Squad 1, Platoon Jade, Sandatahang Platun Pampropaganda 3 (SPP3) TOTO, Guerilla Front 4B (GF4B), NCMRC ang sunod nga mitahan bitbit ang iyang usa ka unit nga Carbine rifle ug mga buhing bala.
Gibutyag ni 2nd. Lieutenant Tere Ingente tigmapaba sa 4th Infantry Division (4ID) Philippine Army nga tungod sa kagutom sa sige og lakaw lakaw sa kabukiran hinungdan nga mitahan ang duha.
"Kakapoy ug kagutom sa bukid ang usa sa rason. Daghan nga supporter sa NPA ni balhin suporta sa gobyerno kay naay programa ang gobyerno alang kanila," matud ni Ingente sa SunStar SuperBalita.
Gani sa maong dapit 118 usab ka mga supporters ang mipadayag sa ilang dakong suporta sa gobyerno diin ilang gisunong ang flag sa NPA isip pagpakita sa ilang suporta.
Samtang gipadayag ni Lieutenant Colonel Ronald Illana nga dili pa ulahi ang tanan sa buot nga motahan nga mga kauban niini tungod kay bukas ang gobyerno sa pagdawat kanila.
Gidayeg sab ni Brigadier General Eric Vinoya, commander sa 403rd Infantry Brigade, ang pagtahan sa mga sakop sa NPA nga mas gipili ang pagpuyo nga malinawon.
Ang Enhance Comprehensive Local Integration Program (Eclip) nga programa sa gobyerno maoy mosuporta sa walhong grupo diin sila makadawat og assistance gikan sa nagkalain-laing ahensya aron makasugod sa pagbalik sa komunidad.
Matod ni Major General Ronald Villanueva, commander sa 4ID, nga suportado sa gobyerno ang mga NPA diin giayo sila pagtratar sa ilang pagbalik.
Malaumon kining dili lang kini ang katapusan apan daghan pa sa grupo ang mas piliong magpuyo layo sa kagubot ug kagutom.