PATUBAGON sa Konseho ning dakbayan sa Cagayan de Oro ang National Food Authority (NFA) kalabot sa mga reklamo sa taas nga presyo sa NFA rice ug ang giingong walay bugas sa mga merkado.
Si Konsehal George Goking, chairman sa Committee on Ways and Means sa Konseho, nibutyag nga daghan sila og nadawat nga mga reklamo gikan sa katawhan.
Sa ilang gihimo nga pagsusi nasayran nga dunay mga namaligya og NFA rice sa kantidad nga P50 ngadto na sa P60 matag kilo diin ang presyo niini anaa lamang sa P27.
Tumong ni Goking nga mapatawag ang mga tinugyanan sa NFA aron tubagon ang maong mga reklamo tungod kay ang katawhan ang apektado niini.
“Akong gisultian ang NFA tarunga pud na inyong mga price last time akong na estorya ang P27 nga bugas naa sa bukid nganong didto man ibaligya," tipik sa pahayag niini.
Lakip sa rason sa pagpatawag ang taho diin giingog wala nay igong supply sa NFA ang kamerkadohan.
Samtang gipatawag usab ang mga retailers aron masayran ang tinubdan sa problema ug mahatagan og aksyon.