Dear Atty. Joan,
Maayong adlaw attorney. Ako diay si Ana Mae, akong suliran kabahin sa akong usa ka anak.
Nagbuwag mi sa iyang amahan 3 months pa lang ang bata kay adik ug manapat, usab pa sad nanguyab ug lain. Wala mi nakasal, ug wala man gani siya niatubang sa akong ginikanan. Mao to nga akoy nagpa dako sa akong anak nga walay amahan.
Nagsugod og padala og kwarta ang iyang lola pag- abot og 2 years old sa bata ug sukad ato nagsige na siyag padala once every three months ug kwarta. Naabot na pud ang papa sa akong anak gikan sa Manila ug gihulman ang bata.
Pagkuha na nako sa bata gikan sa iyang papa, naglagot ko kay gipasagdan ra ang bata ug laag sa silingan mao to nga dili nako magpautro.
Kasuhon kuno ko sa lola sa bata ug makuha daw nila anytime ang bata kay minyo na kuno ko ug lain ug nagsuporta kuno sila.
Asa naman akong katungod isip ka inahan?
Ana Mae
Ana Mae,
Maayong adlaw Ana Mae, ang atong balaud nag ingon nga walay bata nga nagpangidaron ug sais anyos pa ubos ang mahibulag sa iyang mama basta walay igong rason nga makapapugos sa korte sa pagdumili niini.
Ang katungod sa kustodiya sa bata kay nag tubod sa pagpahimulos sa ginikanang katungod.
Ang ginikanang katungod mao nang sitwasyon nga ang ginakanan maoy nangunay ug bantay ug protektar sa mga panginahanglanon sa bata. Mao kini ang katungod ug obligasyon sa usa ka ginakanan sa pag amuma ug pag atiman sa bata.
Sa imong kahimtang, ang balaud pabor nga ang kustodiya sa bata adto sa imoha gumikan nga ikaw ang inahan sa bata ug ang edad sa maong bata kay ubos sa sais anyos. Dili makapugsanong rason ang kaminyuon sa laing lalaki, ug pagsuporta kay usa kini ka obligasyon sa usa ka amahan ug dili igong rason para makuha ang kustodiya sa bata nga nag pangidad ug dos anyos.
Hinaot nakatabang ang maong tambag kanimo.
Atty. Joan
Children's Legal Bureau (CLB)
Pahibalo: Kini opinyon lamang nga na-base sa inyong lakbit-saysay ug kini pwede nga mausab kun dugang pa nga mapatin-awan ang mga detalye. Kon adunay pa kamoy mga pangutana nga adunay kalabutan sa katungod sa mga bata, mahimo kamong mo-message pinaagi sa among Facebook account CLB