GILIBKAS na ang warning Signal Number 1 sa Babuyan Group of Islands ug sa amihanang bahin sa Ilocos Norte samtang ang bagyong “Henry,” nahimo nang tropical storm kagahapon sa buntag, apan naa na sa gawas sa Philippine area of responsibility.
Apan ang state weather bureau nipahimangno sa publiko sa laing weather disturbance, nga hayan mahimong tropical depression sa mosunod nga 36 oras.
Ang Philippine Atmospheric, Geophysical and Astronomical Services Administration (Pagasa) niingon nga mga alas 10 kagahapon sa buntag, ang low pressure area nahimutang mga 915 kilometros silangan sa Aparri, Cagayan.
Ang Southwest Monsoon (Habagat) padayong modalag uwan sa Metro Manila, Zambales, Bataan, Cavite, Batangas, Mindoro Provinces, Palawan ug Western Visayas, ingon man katag nga mga uwan ug panugdog ug kilat.
Mao usab kini ang gitumbok nga hinungdan sa dagkong mga bawod sa kadagatan sa Sugbo. (Sunnex)