NAKITA karon sa Mines and Geosciences Bureau (MGB) 7 nga mas nilambo pa ang negosyo sa minahan sa Central Visayas subay niining programa sa Duterte Administration nga Build, Build, Build, projects.
Nasayran nga niabot na sa P1.2 bilyones ang hiniusa nga halin sa mga minahan sa Central Visayas niadtong 2017.
Sa datus sa MGB 7 nakita ang pagsaka sa volume produced sa sand and gravel gikan sa P150 milyones niadtong 2016, ngadto sa P269 milyones sa 2017.
Nagkasaka usab ang volume produced sa limestone o anapog gikan sa P448 milyones niadtong 2016, sa P476 milyones sa nakalabay nga tuig, doble kini sa produced niadtong 2014 nga anaa lang sa P242 milyones.
Ang basalt usab nakita ang pagsaka gikan sa P128 milyones ngadto sa P167 milyones sa nakalabay nga tuig.
Matod ni MGB 7 regional director Loreto Alburo nga 50 porsiyento sa mga minahan sa Central Visayas anaa sa Sugbo gisundan kini sa Negros Oriental, Bohol, ug Siquijor.
Nasayran nga nag-una ang limestone nga dakog kita.
Pasabot ni Alburo nga tungod kay construction materials kini, hinungdan nga in-demand kini karon ilabi na nga gikatakda na ang pagtukod sa ikatulong taytayan nga magkonektar sa dakbayan sa Sugbo paingon sa Cordova.
Dugang ni Alburo nga tres porsiyento sa gross sales value, mapunta kini sa excise tax diin ang 40 porsiyento tungaon sa LGUs sa barangay, municipal, ug provincial government samtang ang laing 60 porsiyento mopaingon sa national government.
Pasalig hinuon sa direktor nga bisan og malaumbuon ang industriya sa mina, importante gihapon mga nisubay kini sa balaod. (HBL)