NAKITA sa hepe sa Lapu-Lapu City Disaster Risk Reduction Management Council (CDRRMC) Andy Berame ang panginahanglan nga ipaubos sa seminar ang mga nanag-iya ug crew sa pumpboat nga mabiyahian sa mainland Lapu-Lapu–Olango island vice versa aron pamahinumduman sa precautionary measures sa pag-operate.
Gibutyag ni Berame nga iyang isugyot ngadto ni Mayor Paz Radaza ang tinguha sa katuyoan nga di na masubli ang nahitabo sa m/bca Santa Rosa Princess niadtong adlawng Lunes nga nasanapan og tubig dagat human gihampak sa dagkong bawod.
“Kinahanglan sa atong small scale seafarer ma-reminded sa protocols ug safety during sa ilang paglawig,” tipik sa pamahayag sa opisyal.
Girekomindar ni Berame ang si Capt. Francisco Pablo kanhi dean sa maritime training school sa Cebu ug siya sab ang author ug facilitator sa Disaster Management Prevention & Mitigation alang sa mga mananagat ug pumpboat captain nga maoy modumala sa seminar.
Samtang ang Cebu Coast Guard Sub-Station, Mandaue sa ilang incident report sa Sta. Rosa Princess nga anaa sa gibana-bana nga gilay-ong nga 500 meters sa pantalan sa Santa Rosa, Olango sa dihang gikuso-kuso sa dagkong bawod sa dihang modungo na unta sa maong pantalan.
Tungod niini nasudlan og tubig ang pumpboat diin sakay ang 32 ka mga pasahero nga miresulta sa pagka-unlod sa katunga sa maong sakayan.
“Wa ra matikyaob, nasabwan (nasudlan og tubig dagat) ra ang pumpboat,” saysay ni Myrna Ompad-Daño, usa sa tag-iya sa pumpboat.
Mga pumpboat nga duol sa area ang mitabang sa paghakot sa mga pasahero aron nga mahatod sa pantalan samtang nahumod ang mga kargamento ug personal nga butang sa mga pasahero. (FVQ)