PASAKAHAN nag kasong administratiba ang duha ka police nga sakop sa Cebu City Police Office nga nakuhaag hulagway nga nanugal sa tigbakayan niadtong milabayng buwan.
Usa ka seryoso nga kaso ang atubangon sa duha ka mga police nga nakuhaag hulagway nga naa sa tigbakayan sa A. Lopez, Barangay Calamba sa siyudad sa Sugbo ug siyudad sa Naga.
Matod ni P/SSupt. Royina Garma nga mag-atubang na og kasong administratiba silang SPO1 Felipe Alfeche nga nadestino sa Personnel Holding and Accounting Unit sa Cebu City Police Office ug PO2 Jansen Caña sakop sa Abellana Police station 2.
Niadtong miaging adlaw mipagawas og kamandoan si Garma pagparelibo sa duha gikan sa ilang tagsa-tagsa ka mga assignment ug gibalhin sila sa CCPO Headquarters.
Gawas sa hulagway nga gipakita ni P/CSupt. Debold Sinas, director sa Police Regional Office 7, nga naa ra nagtan-aw sa duha ka manok nga gitari nakadawat usab og hulagway si Garma sa maong mga police nga maoy nag hawid sa manok sud sa royda sa tigbakayan.
“Lahat kasi ng pulis bawal pumasok sa mga sugalan lalo na sa tigbakay, yung isa there was a picture coming from a concerned citizen na napicturan nila yung pulis na nag-release ng manok” matod ni Garma.
Nakakuhag kasayuran si Garma nga si Alfeche giingong tulo ka buwan nalang unta mo retiro na kini sa serbisyo gani naka non- duty status (NDS) na kini.
Apan mahimong peligro nga di makadawat sa iyang benepisyo ang pulis kay matod ni Garma nga bisan naka NDS kini police pa gihapon si Alfeche ug masilotan sa salaod nga iyang nahimo.
“Police pa rin sya kahit naka NDS (non duty status) ka nasa active duty ka pa rin sa pnp, so unfortunately sorry sya ganun lang yun, mag behave ka talaga kahit nag retire kana be a model sa community,” matod ni Garma.
Giawhag ni Garma ang publiko nga kuhaan nilag picture kining mga pulis nga makita sa mga pasugalan og ipadala sa Itug-an ni CD sa Facebook aron ipaubos nila sa imbestigasyon.
Kabahin sa internal cleansing sa PNP ang paggukod niadtong mga pulis nga kusog mosud sa mga sugalan sanglit usa ni sa mga hinungdan nga mangurakot ang usa ka pulis ug mosud nalang sa ilegal nga negosyo.
Samtang gipaubos usab sa marriage encounter ang mga pulis nga sakop sa CCPO nga nag-atubang karon og problema sa ilang kaminyuon.
Ang katuyoan niini nga ilang matul-id ang ilang kasungian sa pamilya ilabi na kadtong nangitag laing pamilya gawas sa ilang pinakaslan. (AYB)