USA ka sakop sa Sangguniang Kabataan (SK) sa Brgy. Cambanay, siyudad sa Danao ang nag-positibo sa gipahigayon nga random drug test sa Cebu Provincial Anti-Drug Abuse Office (CPADAO).
Kon mapamatud-an sa confirmatory test nga positibo siya sa paggamit og drugas, itugyan sa CPADAO sa Department of Interior and Local Government (DILG) ang desisyon kon taktakon sa pwesto ang SK official.
Gitug-an ni CPADAO Executive Director Ivy Meca nga gihimo ang surprise drug test sa Cambanay, Danao niadtong Hulyo 8.
Gitago una ang identity sa opisyal samtang nagpaabot sa resulta sa confirmatory test.
Matod ni Mecanga bugtong siya lang nag-positibo sa drug test sa 55 ka mga barangay ug SK officials ingun man mga kawani sa barangay nga gipaubos niini.
Una kining higayon nga may-nagpositibo sa drug test gikan sa barangay sukad nilingkod ang mga bag-ong opisyal.
Sigun sa CPADAO, itugyan nila sa DILG ang aksiyon batok sa SK official kon mapamatud-an sa confirmatory test nga nigamit siya og drugas.
Ubos sa mga lagda sa Civil Service Commission, ang mga kawani sa gobiyerno nga mag-positibo sa drug test, kinahanglang i-assess sa Department of Health alang usab sa intervention nga himuon.
Kon low ug mid-risk lang ang pagka-adik niini, hayan nga mopaubos kini sa out-patient rehabilitation apan kon grabe ang pagkagumon niya sa drugas, kinahanglang ipaubos kini sa in-house rehab.
Gawas sa Danao, may gihimo nga drug test ang CPADAO sa 171 ka mga barangay ug SK officials a lungsod sa Dumanjug niadtong Hulyo 5 apan nag-negatibo silang tanan niini.
Sa laing bahin, may usa ka job-order employee hinuon sa siyudad sa Naga ang nag-posiitbo sab sa paggamit og shabu.
Sa 65 ka mga LGU employee ug 21 ka mga BJMP personnel sa dakbayan nga gipaubos sa drug test niadtong Hulyo 16, bugtong siya lang ang ni-positibo.
Niadtong Hulyo 9, 139 ka mga kawani sa Cordova LGU, PNP ug BFP sa lungsod ang gi-drug test sab sa CPADAO. Negatibo hinuon silang tanan niini. (AZLG)