MAMAHIMO nang maagian ang isigka kilid nga lanes sa Natalio Bacalso avenue sa approach sa underpass project sa Mambaling, dakbayan sa Sugbo kon mahuman na ang ikalimang hugna sa trabaho karong Septiyembre ning tuiga.
Nagpasabot nga magtagsa na ka lane ang mga sakyanan nga mopaingon sa kinapusoran sa Cebu City ug kadtong mopadung sa habagatan.
Kini ang gipahibawo ni project director engineer Roy Dela Cruz sa Department of Public Works and Highways (DPWH) 7 atol sa 888 News Forum kagahapon.
Matod ni de la Cruz nga makatampo kini sa pagluag sa trapiko kon itandi sa pagkakaron nga usa lang ka lane ang gigamit.
Sa pagkakaron, problema pa nila ang road-right-of-way acquisition alang unta sa pagpalapad sa karsada.
Enforcers mibalik
Ni-arang-arang na ang dagan sa mga sakyanan sa N. Bacalso avenue habig sa Barangay Mambaling human kini gibalik ni Mayor Tomas Osmeña ang mga traffic enforcer sa Cebu City Transportation Office (CCTO).
Si Francisco “Isko” Ouano, operations head sa CCTO, nagkanayon 24 ka mga traffic enforcer ang ilang gi-deploy, 12 sa buntag ug laing 12 sa hapon hangtod alas 10 sa gabii.
Matod pa ni Ouano nga dako ang deperensiya sa traffic flow niadtong Lunes diin way mga CCTO personnel sa lugar human nimando ang mayor nga itugyan ngadto sa Land Transportation Office (LTO7) ang pagdumala sa trapiko.
“Makaingon gyud ta nga layo ra kaayo og deperensiya kay nakita nato base sa atong obserbasyon nga naa gyuy mo-man sa traffic,” pasabot ni Ouano.
“Kagahapon naa tay pipila nga nahinabi nga mga commuters diin ang uban wala maka-eskwela ug wala makatrabaho tungod lagi atong way enforcers nga nimugna og dili tiaw nga kahuot sa trapiko,” dugang sa operations head sa CCTO.
Gihulagway niya nga niadtong Lunes, ang trapik nagsugod sayo pa sa buntag hangtod sa hapon ug nilungtad pa hangtod sa pagkagabii.
Gawas nga way personnel gikan sa CCTO, wa say personnel gikan sa LTO-7 apan adunay presensya sa pipila ka mga pulis nga sakop sa Traffic Patrol Group ug mga barangay tanod.
“Daghan ang nalipay nga nabalik na ta tungod lagi sa sitwasyon kagahapon (Lunes) ug naaa say uban nga nisaway kay di man nato matag-an ang ilang hunahuna ug ang importante nga visible ang mga enforcers,” dugang ni Ouano.
Si Ouano nangayo og pagsabot sa publiko nga di malikayan nga makasinati og kahuot sa trapiko sanglit usa sab kini sa timailhan nga progresibo ang Cebu City ug konnga mahuman na ang underpass, ang publiko makabenepisyo. (PAC, Erwin Loregas USJ-R Comm Intern)