MAS istrikto nga mga security measure ang ipatuman sa Cebu South Bus Terminal human sila nalutsan sa mga gun runner niadtong Sabado.
Tagdumala sa pasilidad nihulagway nga naleksiyon sila sa insidente.
Nasuta sa kuha sa close circuit television (CCTV) nga nagmotorsiklo ang mga suspek sa pagsulod sa terminal hinungdan nga wa makaagi sa entrance nga dunay gwardiya.
Samtang, napasakaan na og reklamo ngadto sa Provincial Prosecutor’s Office ang mga suspetsadong gun runner nga sila si Velino Cubol, Flora Mae Cubol ug Marian Bella Manot.
Gimando ni CSBT operations manager Joey Herrera sa mga gwardiya sa terminal ang pagpainspeksiyon na sa tanang bagahe ug dala sa mga pasahero nga mosulod sa pasilidad.
Matod niya, naleksiyon sila sa insidente niadtong Sabado human nakasulod ug nakasakay og bus sulod mismo sa CSBT ang tulo ka mga gidudahang gun runner nga nasikop sa lungsod sa Samboan.
Na-trace sa CSBT management sa kuha sa ilang CCTV nga positibong niagi sa terminal ang tulo ka mga suspek.
Ang duha sa mga suspek nagsakay og motosiklo dala ang mga ilang mga bagahe samtang ang usa ka babayeng suspek nagpaabot na daan sulod sa terminal.
Nigawas sa pasilidad ang suspek nga nag-drive sa motor ug gi-park sa convenience store atbang sa CSBT.
Nisulod siyag balik agi sa Entrance 1 ug nagkuyog na silang tulo pagsakay og bus nga dunay biyaheng Zamboanga.
Gitaho ni Herrera kagahapon sa buntag sa Abellana Police Station ang presensiya sa motorsiklo nga gigamit sa mga suspek sa nahisgutang convenience store. Nasuta sa kapulisan gikan sa Land Transportation Office nga nakapangalan kini sa usa sa mga suspek nga nasikop sa Samboan.
Tungod sa lapso sa seguridad sa CSBT niingon si Herrera nga inspeksiyonon ang tanang mga bagahe bahala na og malangay ang mga pasahero.
Gawas sa inspeksiyon sa entrance, ipainspeksiyon na usab kini sa di pa mosakay sa bus. (AZLG)