GITUMBOK nga hitman sa giingong drug lord nga si Alvaro “Barok” Alvaro namatay human giingong nisulong sa Danao City Police Station niadtong Lunes sa gabii.
Ang namatay giila sa kapulisan nga si Jerandy Mediquillo Montes, lumolupyo sa mao nga dakbayan, kinsa dead-on-arrival (DOA) human nakigpinusilay sa mga intelligence officer sa Danao City Police Station.
Si Supt. Jaimer Quecho, hepe sa Danao Police Station nga nahinabi sa Superbalita Cebu, nagkanayon nga sa wa pa ang hitabo, si Montes niabot sa ilang temporary Danao City Police Station sa may Rizal Street, mga alas 11:30 sa gabii niadtong Lunes.
Matod ni Quecho nga si Montes nagsakay sa usa ka motorsiklo ug nipailang sakop sa military.
Siya nagsul-ob og Army shirt, camouflage nga pantalon ug nag-combat boots.
Gibutyag niya nga si Montes nangita sa ilang tulo ka pulis nga sila si SPO1 Reynante Manulat, PO3 Phil Restauro ug PO2 Mark Anthony Mata.
Apan wa kini niya makit-i hinungdan nga nilakaw kini ug niadto sa karaang police station nga nasunog niadtong Enero 2015.
Nisulod kini sa buhatan sa intelligence unit nga nahimutang sa likod sa edipisyo ug nangutana asa ang tulo ka mga pulis.
Atol sa pagpangita ni Montes, diha si Mata uban sa laing police officer apan wa siya mailhi.
Si Quecho niingon nga si Mata wa magpaila ug gisultihan niya ang suspek nga wa sila si Restauro ug Manulat.
Si Mata daling nialerto sa iyang kaubang pulis kabahin sa gikatahapan.
Apan sa ilang paggawas sa opisina, si Montes giingong nibunot sa iyang kalibre .45 nga pistola ug gipamusil sila si Mata ug kauban.
Nakatago ang mga pulis ug nibawos sa pagpusil, diin si Montes naigo ug dali nilang gidala sa tambalanan, apan gideklarar nga dead on arrival (DOA) tungod sa daghang mga samad sa lawas.
Nasuta usab nila sa lawas nga duna kini habak nga gituohang mga anting-anting.
Duna kini mga patik sa lawas nga gituohan gihapon nga anting-ating.
Si Quecho mibutyag nga si Montes mibahad na kini nga iyang hutdon sa pagtumba ang tulo ka intelligence officers nga maoy naggukod kaniya niadtong Mayo 2015 human napatay niya si Jose Manulat ug asawa niini.
“Ang asawa niini gi-hostage niya dihang dakpon na unta sa atong mga intel dihang nakapatay, mao nga nakaikyas,” dugang ni Quecho.
Gawas niini, nanganti si Montes nga kadtong mga pulis nga modakop unta niya iyang balikan.
Si Montes gikahadlukan sa ilang lugar sanglit sinaligan kini ni Barok.
Apan human nasikop si Barok, nagbalhinbalhin na kini og lainlaing lungsod aron sa pagtago.