SO, bisan pa man sa iyang pangidaron, gipamatuod ni Manny Pacquiao nga dakong sayop ang iyang mga kritiko human niya gi-knockout si World Boxing Association (WBA) welterweight king Lucas Matthysse sa ikapito nga round sa ilang world title fight niadtong Dominggo sa Axiata Arena, Kuala Lumpur, Malaysia.
Katulo gyud ka mga higayon iyang gitumba ang Argentinian fighter sa wa pa kini undanga sa beterano ug inilang referee nga si Kenny Bayless.
Ang knockout nga kadaugan maoy unang nahimo sa bugtong eight-time division champion sukad niadtong 2009 diin iyang napaundang si Miguel Cotto sa ika-12 nga round.
Niadto man gud nga pagkapildi ni Pacquiao sa mga kamot sa Australianong si Jeff Horn, misubaw dayon ang mga negatibong komento nga miunlod ug mihupas na ang kahanas ni Pacquiao ibabaw sa ring tungod sa iyang edad ug sa iyang gimbuhaton isip usa ka senador.
Pero dili kini maoy unang higayon nga nakadawat og susama niining pagsaway si Pacquiao. Mao usab kini ang nahitabo niadtong brutal niyang kapildihan batok kang Juan Manuel Marquez sa 2012 ug ni Floyd Mayweather Jr. sa 2015.
Apan sa gihapon, ang 39-anyos nga Pacquiao makamaong motimbakawas ug mopamatuod sa iyang kaugalingon nga nagpabilin ug anaa gihapon kaniya ang kusog, kalantip ug kahanas nga iyang napakita kaniadto.
Kini iyang nahimo bisan pa man wala ang iyang long time trainer sa 16 ka tuig nga si Freddie Roach kinsa iyang gipalagpot human sa iyang kapildihan ni Jeff Horn sa niaging tuig.
Si Roach man gud mipabuhagay ngadto sa mga media nga si Pacquiao angay nang moretiro, tungod kay gawas sa iyang edad ug sa pagka senador sa nasod niini, dili na kini maka-focus sa iyang boxing career.
Wa makauyon si Pacquiao sa pamahayag ni Roach ug giingon nga kini maoy rason kon nganong gipalagpot siya isip chief trainer sa Pambansang Kamao. Unsa pa man tuoy makuha ni Pacquiao gikan sa trainer nga wa nay pagsalig kaniya.
* * *
Ayaw lang nya mo og ka kugang kon minus kaayo ang pay-per-view diri sa Estados Unidos (diin dia kita diri karon nagbakasyon).
Kini tungod lay uwahi na kaayo nga milihok si Bob Arum sa Top Rank sa pag-advertise sa maong away.
Si Arum, bisan og di na siya ang nag-promote, maoy gihatagan ni Pacquiao sa broadcasting right sa away diri sa US.
Wa dayon ni niya lihoka kay wa lagi kuno mopagawas og kuwarta si Pacquiao nga maoy promoter.
Gani iya pa gipakatap nga posibling di mahinayon ang maong away. Matawag nga sagol kasuko ang gihimo ni Arum ilabi na iyang nasayran nga si Oscar dela Hoya, ang iyang karibal, maoy gikaayuda ni Pacquiao sa promotion.
Ug sa gipakita ni Arum, kuli na kaayo nga mobalik sa iyang sabakan si Pacquiao ilabi na nga nahimo ra man diay nila ang promotion nga wala ang Top Rank.
Wa pa man tuoy katinuan, pero mosibaw gyud ang pangagpas nga si Pacquiao hingpit nga mosalikway ni Arum ug adto na mopaoraray ni De La Hoya.
Wa nay Roach, wa na say Arum. Mao ni ang bag-ong Pacquiao. (junmigs0622@yahoo.com)