MAGTAGAY og suway ang San Miguel Beermen sa unang lingkuranan sa finals sa ilang pagpakigbatok og balik sa Alaska Aces sugod karong alas 7:00 sa gabii sa Game 3 sa ilang semi-finals series sa Philippine Basketball Association (PBA) Commissioner’s Cup sa Araneta Coliseum.
Ang Aces nagbitay na sa panamilit human sila nasugamak sa laing kapildihan, 94-105, niadtong Lunes sa gabii nga nakahatag sa defending champions Beermen og 2-0 nga bintaha sa best-of-5 series.
Nagkanayon si Aces coach Alex Compton nga padayong taas ang ilang moral nga mopadayon ning maong tahas gumikan kay wala sila’y angayang ikauwaw kon mapakyas man gani sila sa hingpit.
“We didn’t come out on top but I’m not ashamed of our effort,” matod ni Compton sa interbyu sa PBA.PH.
“I’m proud of the players today. They left it all out there.”
Ang Aces nakaabot gihapon ning puntoha bisan wala ang duha sa ilang mga sinaligan nga sila si Calvin Abueva ug Chris Banchero.
Sa Game 2, ang Aces nakamugna unta og 16 puntos nga labaw, 41-25, sa 2nd quarter apan nahutdan og lahutay sa pagpadayon sa kombati.
Kon modaog ang Beermen karon, hayan maghuwat na lang sila sa molampos sa laing semi-final series tali sa Brgy. Ginebra Gin Kings ug Rain or Shine Elasto Painters diin kasamtangang nag-una ang Gin Kings, 1-0.
Ang Game 2 tali sa Gin Kings ug Elasto Painters nga gikatakda unta kagabii nauswag gumikan sa ngil-ad nga panahon sa kaulohan.
Sa laing bahin, ang Sugbuanong higante nga si JuneMar Fajardo mao bag-ong napiling PBA Press Corps Player of the Week awardee human sa maayo niyang gipakita sa miaging duha ka mga duwa sa San Miguel Beermen sa semi-finals.
Nag-average si Fajardo og 21 puntos ug 11.3 rebounds ning mga duwaa. (ESL)