MIPATIGBABAW sila si Desidirio “Sano” Engbino ug Marivic Mari sa 1st Team ADR’s Cebu North 50-kilometer Ultramarathon nga nanukad ug nahuman ra sab sa siyudad sa Bogo niadtong Dominggo.
Si Engbino sa Spectrum Runners Club mitali og tulo ka mga oras, 55 ka mga minutos ug 50 ka mga segundos aron dag-on ang men’s division.
Nagsunod kang Engbino mao si Edil Batiancila, kinsa mirehistro og 4:05:53 samtang ikatulo si Isidro Moradas, kinsa mitali og 4:42:08.
Midaog si Mari sa women’s division pinaagi sa oras nga 5:54:54, ikaduha si Mary Claire Maranga (6:08:05) ug ikatulo si Lilian Racuya (6:34:11).
Ang lumba gipasiugdahan sa ADR running team alang kang PO2 Brian Lou Guillen, kinsa nakuyapan una nakaabot sa finish line sa Ironman 70.3 Philippines sa Lapu-Lapu City sa miaging tuig. Padayon pang nagpaalim si Guillen.
Nagkanayon si race director Jez Ramos nga malipayon siya sa gipakitang suporta sa running community ning maong lumba, nga tipik sab sa 5th year anniversary sa Team ADR.
"The purpose of the run is to help the expenses of Brian Guillen, our teammate," matod ni Ramos.
"Brian is still needing variuos operations and therapies and assistance. He is still bed-ridden."
Nidugang si Ramos nga nagplano silang himuong tinuig kining maong lumba.
Ang makutas nga lumba gilangkuban sab og 25K category diin midaog si Vivencio Narca sa men's division ug Filrose Mejorada sa women’s division. (RSC, ESL)