GISUGAT si Jhack Tepora og hero’s welcome sa iyang pamilya, kahigalaan ug mga kauban sa Omega boxing stable sa iyang pagbalik sa Sugbo sa miaging gabii gikan sa malampusong kampanya sa top supporting bout sa Manny Pacquiao-Lucas Matthysse bout sa Kuala Lumpur, Malaysia.
Hinayhinay nang nailhan si Tepora sa kalibutan sa boksing human niya gipaundang sa 9th round si Mexican Edivaldo aron angkunon ang interim World Boxing Association (WBA) featherweight title sa Axiata Arena.
“Malipayon kaayo ko. Wa ko nakasabot sa akong kalipay karon. Ganina daghang mga tawo ang nagpa-picture kauban nako. Kaniadto, wala’y magpa-picture nako,” matod ni Tepora sa interbyu sa Sun.Star Cebu, igsuong buhatan ning mantalaan.
Sa iyang paghiabot, adunay motorcade nga gipahigayon alang kang Tepora nga nanukad sa Mactan-Cebu International Airport paingon sa International Pharmaceuticals Incorporated sa Mabolo diin gipahigayon ang usa ka press conference.
Gitumba ni Tepora si Ortega pinaagi sa usa ka makusog nga right uppercut nga gisundan og mga kumbinasyon sa kumo nga maoy nakapugos sa referee nga undangon ang away sa ika-2:38 sa round.
“Nasakitan sab ko sa away. Lig-on siya, iya ra’ng kan-on ang akong kusog nga mga sukmag. Nataymingan lang gyud nako siya sa 9th round,” dugang ni Tepora.
“Ang among strategy kay mamundo mi og puntos ug dili magdali kay nakahibalo ming lig-on siya,” matod ni Tepora, kinsa misaka sa 22-0, 17KOs nga rekord.
Nidugang si Tepora nga adunay higayon nga ablihon niya ang iyang depensa aron danihon si Ortega nga moataki gumikan kay maayo kining nakadepensa.
Giangkon ni Tepora nga aduna sa’y sakto nga kusog si Ortega, kinsa iyang gihulagway nga maoy labing lisod niyang nakontra sukad masukad.
Matod ni Tepora nga sa 1st round pa lang, iyang nang nabatyagan ang kakusog sa kumo ni Ortega ug giangkon niyang nasakitan na siya’g sugod niadtong higayuna.
Gipahibalo ni Tepora nga posibleng moaway siya’g balik karong Nobiyembre sa usa ka MP Promotions event.
Wala pa’y ideya si Tepora kon kinsa ang giplanuhang kuhaon sa MP Promotions nga iparang kaniya sa sunod niyang tahas. (EKA, ESL)