SECTIONS
Saturday August 18, 2018
SUPERBALITA CEBU

Manny ‘adik’ sa boksing

Hero’s welcome. Gitapuk-an ang bag-ong WBA welterweight champion Manny Pacquiao (tunga) atol sa iyang pagbalik sa Pilipinas sa miaging adlaw gikan sa malampusong away sa Kuala Lumpur, Malaysia diin iyang gi-TKO sa 7th round si Argentine Lucas Matthysse. (MP Promotions)

GIPASABOT Sa bag-ong World Boxing Association (WBA) welterweight champion Manny Pacquiao nga daw na-adik siya sa boksing hinungdan nga bisan sa iyang pangidaron, wala gihapon masulod sa iyang alimpatakan ang terminong retiro.

Gipamatud-an sa Pambansang Kamao ng Pilipinas nga dili pa siya angayang moretiro sa boksing pinaagi sa iyang impresibo ug dominanteng 7th round TKO nga kadaugan batok kang Argentine Lucas Matthysse niadtong Dominggo sa Kuala Lumpur, Malaysia.

Ning maong away, daw gipaatras ni Pacquiao ang dagan sa oras ug gipagawas niya ang iyang katakos sa pagkabatan-on aron tumbahon si Matthysse sulod sa tulo ka mga higayon aron ilugon ang WBA title.

Bitbit ang 60-7-2, 39KOs nga rekord, ang 8-division world champion gusto pang moaway og duha ngadto sa tulo ka mga higayon una niya hunahunaon ang pagretiro.

“My next fight, I want to defend my belt,” matod ni Pacquiao sa interbyu sa www.boxingscene.com.

“If boxing is not my passion, I would not fight again. It’s like I’m addicted to boxing and I really love to fight and bring honour to my country. That’s my heart’s desire.”

Lakip sa posibleng sunod nga makontra sa fighting senator mao sila World Boxing Organization (WBO) welterweight champion American Terence Crawford ug

Ukranian Vasyl Lomachenko, kinsa nahimo sab nga world champion sa junior lightweight (130) ug featherweight (126) divisions.

Wala’y isyu kon makig-away si Pacquiao kang Crawford gumikan kay pareho man silang nagkampanya 147 lbs.

Apan adunay problema kabahin kang Lomachenko, kinsa nipadayag nang daan nga moaway ni Pacquiao sa 130 apan ang gusto ni Pacquiao sa 135.

Apan kon ang dugay nang strength and conditioning coach ni Pacquiao nga si Justine Fortune, wala kanila ni Crawford o Lomachencko ang angayang sunod kontrahon sa iyang batos.

Kon siya lang ang matuman, gusto ni Fortune nga si British star Amir Khan maoy kontrahon ni Pacquiao sa Wembley Stadium sa London.

Sa panglantaw ni Fortune, ang panagharong sa kanhi sparring partners makadani og daghang boxing fans sa England ug dugang milyones sa pay-per-view sa tibuok kalibutan.

“If I had my way, I don’t know, (Amir) Khan in London. If I had my way, Pacquiao at Wembley Stadium, 100,000 people (will be there),” matod ni Fortune.

Gipasabot ni Fortune nga naglanoglanog sa kasamtangan ang boksing sa Britain gumikan kang heavyweight world champion Anthony Joshua.

“Englishmen are great fight fans and they love boxing,” dugang ni Fortune.

“Pacquiao versus Amirk Khan in London? Whew!Of course, it’s my way. It’s what I thought, you know.”

Sa miaging tuig, aduna’y plano nga iparang sila si Pacquiao ug Khan sa Dubai apan nahugno ang negusasyon niini.

Kon madayon ang away nila ni Pacquiao ug Khan sa London, yanong buakon niini ang rekord nga 51,025 ka mga tumatan-aw nga ningsaksi sa away nila ni Pacquiao ug Jeff Horn sa Suncorp Stadium sa Brisbane, Australia. (ESL)


VIEW COMMENTS