PASULOD na sa ikatulo ka tuig ang pagserbisyo ni Presidente Rodrigo Duterte sa atong nasud. Daghan na ang kabag-ohan ubos sa iyang liderato apan padayon sab sa pagpanaway ang iyang mga kritiko nga halos sipyat lang sa Presidente ang gibantayan aron mahimong isyu kontra sa iyang administrasyon.
Kon sayop lang ang atong pangitaon sa usa ka lider, daghan ang atong makit-an tungod sama nato tawo lang sab sila, apan kon magtan-aw ta unsay atong ikatabang sa pagpalambo sa nasud basin ang pagpakahilom mas makaayo pa.
Gikalipay sa mga kritiko ang matag lihok nga puwede himuon nga isyu. Mga sakop sa media kanunay sab nagtan-aw, ang makasusubo lang kay nahimo silang kabahin sa laraw pagpahugno sa kasamtangan nga liderato aron lang mapanalipdan ang mga hiwi nga binuhatan sa kanhing administrasyon.
Kon dili si Digong ang nahimong Presidente sa nasud, mabulgar ba kaha ang mga binuang sa milabay nga administrasyon? Mora'g hinlo ang pagpadagan sa kanhi mga opisyal sa atong nasud kay wa kaayo nabulgar ang mga hiwi nga binuhatan labi na ang kurapsiyon. Karon, patong-patong ang mga kaso nga ilang giatubang kay nasiplatan ang ilang mga binuang nga nakadugang sa kalisud sa katawhan.
Kon ang survey sa mga nagkalahi nga mga ahensiya maoy atong basihan kon unsa na gyud ang kahimtang sa atong nasud, maglibog ta kinsa ang nagasulti sa tinuod. Dunay survey nga nagasulti nga wa nay pagsalig ang katawhan sa liderato ni Presidente Duterte. Dunay survey nga kuno miubos ang mga nagtuo ug mibiya na pagsuporta kaniya. Sa laing survey, makita nga misaka ang mga nagatuo nga molambo pa ang nasud sa iyang pagdumala.
Sa pagkampanya ni Digong una ang eleksiyon, nahimo niyang programa o plataporma ang pag-usab sa sistema sa panggobyerno ngadto sa Pederalismo, Kurapsiyon ug Druga.
Gidawat siya sa katawhan apan makapangutana ta nganong karon moingon ang survey nga mas daghan ang dili gusto nga mag-ilis ta sa sistema ngadto sa Federal form of Government? Karon nga gisugdan na ang paghisgot sa Pederalismo sa Senado daghan na kuno ang supak. (Sumpayan)