TUNGOD sa wa mapalong nga ceiling fan, mokabat 60 ka mga balay ang gilamoy sa kalayo alas 10 sa buntag Miyerkules, Hulyo 18, sa Sammy Uy Village, Kilometro 11, Barangay Sasa, Davao City.
Segun ni Ryan Siarot, nga nakit-an na lang nila nga nagkalayo na ang usa sa ilang mga kuwarto sa balay ug dali dayon nga mikanit ang kalayo sa ilang mga silingan sanglit gama sa kahoy ang mga balay.
Ang pamilyang Siarot nagduda nga tungod sa ceiling fan nga gibiyaan nila nga nagsige og andar ang mi-overheat nga maoy gituohang hinungdan sa kalayo.
Mokabat usa ka oras ang pagbugno sa mga bombero aron mapalong ang kalayo.
Sa pagdeklara nga fire under control, didto nakita ang mga binuhing baboy ug mga iro nga nangasunog.
Hinuon, walay kinabuhi sa tawo nga namatay sa maong insidente samtang duna lang mga nakaangkon og ginagmay nga samad atol sa pagsalbar sa ilang mga gamit.
Wala pa gibutyag sa Bureau of Fire and Protection Davao Central Fire District kung pila ang danyos sa hitabo.
Samtang giatiman na sa City Social Services and Development Office ang mga nasunogan ug nagpadayon ang ilang gihimong validation sa mga pamilya nga biktima sa maong hitabo.