WAY duda nga si Snake Princess ang usa sa mga sikat, kundi man gani pinakasikat karon nga social media Influencer sa Visayas ug Mindanao. Daghan ang malingaw sa iyang mga hugot ug kabuang sa video nga trending kanunay sa mga millennial. Wa siya magtuo nga ang iya diay kunong pagkabayot ug pagkaungo sa social media mao ra say mohaw-as niya ug sa iyang pamilya sa kalisdanan. Apan kinsa ug unsa gyuy nagpaluyong tanghaga sa iyang pangan ug pagkatawo? Snake Princess, Ssssuper Ka!!!
Asa ka na-discover?
Sa Tubigon, Bohol pag-2015. Nag-trending man ko sa Facebook katong “Mark Serye”. Mao to gikuha ko sa “Mugstorya” (entertainment website) sa Bohol ug gidala ko sa Cebu aron dire ipadayon akong social media career. Mao to tayma nisikat pud ang mga hugot ni Rowell “Roy” Ucat (Medyo Maldito) mao nga gi-partner mi. Nindot man ang resulta mao nga nagdugay among partnership.
Pilay kinadak-an ninyong likes?
Di ko kahinumdom pero akong followers naay mga 1.8 million. Sa videos namo ni Roy usahay maabot jud og 50,000 shares unya 1 to 2 million views.
Unsay imong sikreto nga sikat man kaayo ka sa social media?
Wa pod ko kahibalo, pero basin malingaw lang gyud sila sa akong videos. Nagpasalamat ko nga grabe ilang pag-support nako.
Ngano gitawag man ka og Snake Princess?
Hilig ko motan-aw og one-piece nga anime unya naay karakter didto nga Snake Princess, siya man akong favorite anime kay lami og power, didto nako nakuha ang akong pangan. Pero ang tinuod gyud nakong pangan, Mark Anthony Abucejo.
Okay ra imong pamilya sa Bohol nga nia ka nagpuyo sa Cebu?
Oo, ako man ang nag-support sa ako pamilya. Ako ra intawn ila gisaligan. Sa una mamoak ra ko og lubi unya mamunit og plastic aron makapalit og pagkaon. Mao dako kaayo ko pasalamat sa Ginoo nga naabot ko ingon ani nga kahimtang kay ginagmay makatabang ko sa ako pamilya.
Unsa diay trabaho sa imong ginikanan?
Wala, unya 8 mi ka managsuon, unya namatay ang usa. Pero ako ra’y bayot sa among pamilya. Makahinumdom ko kanang walay bugas, sige kog hilak. Hatagan na lang mi sa amo silingan para makakaon mi, mao nay usa sa naka-inspire nako nga magtinarong ug maningkamot sa kinabuhi.
Nag-eskwela pa ka?
Kutob ra ko Grade 3 elementary.
Tinuod usa ra mo’g balay ni Roy or Medyo Maldito?
Oo, pero buwag mi og kuwarto. Close kaayo mi ni Roy maora mi og magsuon. Kon wa koy kwarta anha ko niya mangayo. Siya maoy ninghawid savings naho gamay. Support pud siya sa Cebuano movie namo ni Zack.
Unsa nga movie?
Naa mi gihimong movie ni Zack Lim Dipay (Cebu Young Boyband Search 2018 grand winner) nga supported sa Aboitizland nga i-produce sa board of director sa Cebu Young Talent. Pero sa Cebu ra ni isalida.
Daghan lagi ka’g beauty products sa imong Facebook posts?
Mao ra na akong lingaw pagwapa. Mag-apply ko sa akong nawong kadaghan balik-balik kay di man ko makuntento kausa ra. Sa usa ka adlaw katulo ko maligo. Lahi pa nang himasa.
Nagpa-audition daw ka sa Star Hunt sa ABS-CBN niadtong Dominggo?
Oo, grabe kadaghan sa tawo. Wa ko katarung man kay daghan ang nakaila nako mao nga wa na lang ko magdugay, niuli nalang ko’g una. Sunod nalang puhon pod.
Unsay imong upcoming show?
Sa karun wala pa, pero naa mi mga gipanghimo ni Roy nga mga video, mao pa na ako gika-busyhan karon. Aw, naa diay ko sa July 28 sa Tejero Night High School ug Zapatera Night High School para sa “Pakwela sa Balik Eskwela” kauban ang Globe Telecom, Cebu Young Talent and Let’s Go Trek Tours. Magkitakita ta diha.
SUPER FACTS
REAL NAME: Mark Anthony Abucejo
STAGE NAME: Snake Princess
BIRTHDAY: April 22, 1998
HOMETOWN: Tubigon, Bohol
PROFESSION: Social Media Influencer
FACEBOOK FOLLOWERS: 1.8 million
FACEBOOK ACCOUNT: Mark Anthony Abucejo (Snake Princess)
INSTAGRAM: Snakeprincessofficial
TALENTS: Singing, Vlogs, Beauty Pageant
FAVORITE COMEDIAN: Vice Ganda
LOVELIFE: Zero