PORMAL nga gi-turnover ug gibuksan ni Vice President Maria Leonor “Leni” Robredo ang “Angat Buhay Village” niadtong Hulyo 17, 2018 sa lokal nga panggamhanan sa Marawi City ilabi na sa Barangay Sagonsongan.
Atol sa pagbisita ni Robredo sa dakbayan sa Cagayan de Oro niadtong Hulyo 16, 2018, gitunol niini ang 60 ka mga panimalay o transitory shelters alang sa mga bakwit nga apektado sa Marawi siege.
Malipayon ang mga nakabenepisyo sa maong programa gumikan kay aduna na sila’y insaktong mapuy-an.
Gidugang pa niini nga ang construction sa 60 ka mga panimalay gikan sa “Piso Para sa Laban ni Leni” diin donasiyon unta kini alang sa pagbayad sa nahabiling katunga nga cash deposit nga gimando sa Presidential Electronal Tribunal human sa electoral protest batok kaniya ni Ferdinand “Bongbong” Marcos, Jr.
Si Robrero kinahanglan nga magdeposito og P7.5 milyones apan giingong wala siya niining kantidara hinungdan nga hangtod karon wala pa kini makadeposito.
Natandog ang besi presidente sa programa nga “Piso Para sa Laban ni Leni” tungod kay ni-abot sila sa maong kantidad apan dili niini madawat gumikan ang kwarta saglit gidid-an man ang mga opisyal nga modawat og donasyon.
Namugna ang proyekto aron usab makita sa mga ordinayong tawo ang ilang mga sakripisyo sama sa mga drayber nga midonar og P50, P100 ug nangayo pa og pasaylo tungod sa kagamay nga natunol ug nakapatandog kini niya.
Target sa maong “Angat Buhay Village” nga makahatag og 100 ka mga panimalay apan tungod sa kagamay sa yuta nga gi-alokar hinungdan nga nangita pa sila og laing mabutangan sa 40 ka mga panimalay.