ATOL sa pag-atubang ni Misamis Oriental Governor Yevgeny Emano sa mga bakwit sulod sa buhatan sa gobernador kinsa apektado sa giyera sa miaging bulan sa Sitio Kamansi, Barangay Banglay, lungsod sa Lagonglong, iyang gitagsa-tagsa pagtubag ang mga demand sa mga bakwit ngadto niya.
Ang tigpamaba sa lumad nga Tagbalunon nga si Sariza Acosta miladlad sa ilang mga buot hatagan og aksyon sa gobernador.
Una niini, ang pagpahawa sa mga sundalo ug pagguba sa gitukod nga detachment sa ilang dapit. Ikaduha, nga dili hilabtan ang ilang lugar ilabi na dili himuong tourist spot ang ilang hot spring tungod kay balaanong lugar kini sa lumad.
Ikatulo, mao ang unta paglusad og fact-finding mission ug ipatuman ni Emano ang ilang nasabutan sa unang pagbakwit nga mao ang memorandum of understanding.
Si Emano mitagsa-tagsa pagtubag niini. Matod niya sa unang hangyo nga dili niya mahimo ang pagpahawa sa mga sundalo sanglit ubos sa Martial Law ang Mindanao.
Hinuon positibo ang tubag ni Emano sa ika-duhang hangyo sanglit dili na niini ipadayon ang pag develop sa hot spring ug ibubo nalang niini ang pundo sa laing tourist spot nga nagkinahanglan pa og development.
Uyon sab si Emano nga magtukod og fact finding committee diin iyang gimandoan si Atty. Pacana nga mangulo niini uban nilang PDRRMD Head Jun Dy, ug Atty. Beverly Musni ang representate sa Tagbalunon.
Gikasubo sab ni Emano nga niadtong una, ikaduha ug ikatulo nga pagbakwit sa mga lumad iyang natubag ilang mga hangyo ug mihimo sa mutual of understanding apan gipasabot ni Emano nga wala na kiniy bili karon nga ubos sa martial law ang pulo sa Mindanao.
Tungod niini nahimong emosyonal ang pipila ka mga bakwit ug mihangyo nga maghimo og pormal nga suwat ang gobernador kang Presidente Rodrigo Duterte og ipahibalo nga sila ang apektado sa gipatuman nga martial law.
Hinuon unang hugna pa kini sa hisgotanan aron luwas nga makapamauli ang bakwit.
Dungan niini gihangyo ni Emano nga respetuhon unta sa mga bakwit ang adlawng Lunes sa pagpakayab sa nasudnong bandila bisan og dili na kini nila buhaton sa adlaw’ng Martes hangtod Biyernes. nga unta morespeto ang mga bakwit sa adlawng lunes sa pagpakayab sa nasudnong bandila daw bahala magsaba saba na sa Martes paingon sa adlawng Biyernes.
Gipasalig ni Emano nga padayon sila sa paghatag og makaon sa mga bakwit ug dili isapayan ang walay kita sa Capitol Park ang importante mahatag ngadto sa mga bakwit ang serbisyo.