IGO sa dughan ang usa ka lalaki human gipusil sa kainom niini mga alas 8 sa gabii niadtong Hulyo 15, sa Barangay Lanese, lungsod sa Claveria, Misamis Oriental.
Giila ang namatay nga si Mario Soledad, hingkod ang pangidaron, samtang ang suspek nga kainom niini giila nga si Randy Pacatang.
Matod ni Police Senior Inspector Dennis Delos Santos, hepe sa Claveria Police Station, nga nanagbo lamang sa usa ka birthday party ang duha sa ilang silingan dihang nalango sa ilimnong makahubog.
Nagkabikil ang duha nga miresulta sa panaglalis.
“Niingon dayon ang suspek nga naa koy pistola sa balay. Balikan taka,” butayg ni Delos Santos.
Sa pagbalik sa suspetsado, giingong namusil dayon kini nga miresulta sa pagkaigo sa laing silingan ini nga si Hipolito Jumansok sa iyang kamot ug milapos sa dughan ni Soledad.
Gisuwayan pa og dala sa balay tambalanan ang biktima apan gideklarar na kini nga dead on arrival human wala makuha ang bala sa iyang dughan.
Sa pagkakaron, nadakpan na ang suspetsado ug gipangita ang pistola nga gigamit ini nga gitouhang gilabay human sa insidente.
Kasong murder ug frustrated murder ang gipasaka batok kang Pacatang.