LIMA ka mga dagkong convention nga ipahigayon unta sa dakbayan sa Cagayan de Oro ang posibleng makansela tungod sa nasinati nga mga pagbaha ilabi na niadtong niaging semana.
Matod ni Konsehal George Goking, chairman sa Committee on Trade, Commerce and Industry sa konseho ning siyudad, kinsa nga apektado ang mga negusyo tungod sa kanunay nga pagbaha sa kadalanan.
Tungod niini, buot ni Goking nga seryosuhon ang problema sa baha ug mahatagan og dinaliang solusyon.
“Naa ko’y na estorya katong mga possible organizer, natimingan og baha so medyo nakulbaan pud ni sila we will not discourage them to come, we will give them assurance nga we had doing something about the problem,” matod ni Goking.
Apan nagtuo si Goking nga ang 18th council ug lokal nga panggamhanan sa siyudad aduna na’y gihimong lakang alang niini.
Samtang dili usab magduhaduha ang gobyerno pagdeklarar og walay klase kon adunay dautang panahon nga masigpatan.
“I'ts better to take the risk of declaring no school than abot na didto eskwela na sila ayha mamauli,” dugang niini.
Nasayran nga aduna'y bagyo na usab nga gitakdang mosulod sa Philippine Area of Responsibility human ni Bagyong Henry.