UNOM ang patay sa hiniusang One Time Big Time Operation sa Police Regional Office 7 Cebu Provincial Police ug sa kapulisan sa syudad sa Sugbo, Mandaue City, Lapu-Lapu City, Talisay City ug ubang mga dapit sa Sugbo kagahapon sa kaadlawon.
Mokabat sa kapin sa P 8 million nga balor sa drugas ang nasakmit.
Ang labing daghang namatay mao ang operasyon sa kapulisan sa Cebu Provincial Police Office )(CCPO) ug PRO-7.
Sa dakbayan sa Talisay, tulo ang namatay sa target samtang duha sa syudad sa Mandaue ug usa sa lungsod sa Carmen.
Ang kapulisan armado og 23 ka search warrants, 30 ka warrants of arrest, 18 usab ang buy bust operation ug usa ka pagpangibot sa mga tinanum nga marijuana.
Nakasikop silag 74 ka mga tawo, duha ang naka ikyas.
Ang mga nakalas sa Mandaue City giila nga silang Ranchie Rosal Castañeda, taga Guizo, ug Karl Niño Macachor, taga Tabok maong siyudad.
Sa Carmen, ang suspek giilang si Joseph Taoy, taga Barangay Poblacion.
Sa Dakbayan sa Talisay, ang mga nangamatay mao sila si Rene Fernandez, taga barangay Tangke; Rodel Econas, taga Lagtang ug Zebor Canciancio, taga Barangay Lawaan.
Nanukol?
Matod ni PRO 7 Director Chief Superintendent Debold Sinas nga ang unom ka mga drug personalities adunay mga armas ug pulos misukol sa mga operatiba.
Gipangdala pa sila sa mga tambalanan apan patay na kining nadangat sigun sa mga doktor nga mihiling niini.
Gihulagway hinuon nila ni Sinas ug Cebu City Police Director Royina Garma nga malampuson ang maong dungan nga One Time Big Time operation sanglit way nakalas ug naangol sa habig sa kapulisan.
“Ang purpose sa atong dungan nga operation aron kaning mga pushers dinhi dili makadagan sa usa ka lugar aron motago. And this shows dako pa gyud ang atong problema sa drugs,” matod ni Sinas.
Sa syudad sa Sugbo, usa sa mga nasikop ang numero unong konsehal sa barangay Casili, lungsod sa Consolacion ug anak ni kanhi mayor Avelino Gungob Jr. nga si Junie Gungob.
Siya naatlan nga nag pot session sa sulod sa balay sa ilang target nga si Clint Fernandez sa D.A Compound sa M. Velez street, Barangay Guadalupe.
Si Fernandez nalakip sa ilang target list nga nalambigit sa illegal nga drugas ug ang iyang live in partner nga si Aillen Avila Burnales, taga Spolarium, Barangay Duljo Fatima sa syudad sa Sugbo.
Si Burnales giingong hinihugma kaniadto ni Jeffrey Diaz, alyas Jaguar, apan gihimakak kini ni Burnales.
“Ang information namin coming from a concerned citizen and then pag received namin ng information last week, I directed the police station to validate and confirm the report and we are very fortunate that within the week na confirm namin,” matod ni Garma.
Apan hugot nga gihimakak ni Gungob nga nalambigit siya sa illegal nga drugas.
Ang iyang pagpuyo sa Barangay Guadalupe tungod sa ilang negosyo sa Carbon public market.
Sa interview sa sibyaanang Dyhp Rmn Cebu siya nagkanayon nga pag abot sa mga police naa ra siya sa lababo aron manghilam-os, apan gikalitan lang siyag patid sa mga pulis.
Matod ni Barangay Kapitan Edisio Anilin wa siya makabantay nga may bisyo sa drugas si Gungob.
Gani, si Anilin nihatag kang Gungob sa chairmanship sa committee on peace and order.
Samtang, gitug-an sa Consolacion Police Station nga wa si Gungob sa listahan sa mga drug personality sa lungsod.
Moabot ngadto sa kapin sa 400 gramos nga gituohang shabu ang nakuhaa sa kapulisan sa syudad sa Sugbo nga gibana-bana nga mobalor ang tanan og P5 million.
Mandaue
Duha ka mga drug personality ang napatay samtang tulo ang nasikop ug usa ang naka-eskapo sa gihimong simultaneous anti-drug operation sa kapulisan sa nagkadaiyang dapit sa dakbayan sa Mandaue kagahapon sa kadlawon.
Usa sa mga namatay atol sa operasyon sa Mandaue City Police Office (MCPO) mao si Macachor kinsa nakigpinusilay sa mga sakop sa City Intelligence Branch (CIB).
Sumala pa ni P/Supt. Benouli Abalos, pangulo sa CIB nga igo ra unta mopatuman sa search warrant ang iyang grupo sa dihang niuna og paboto sa iyang armas si Macachor.
Daling gidala sa kapulisan sa tambalanan apan gideklarar na kining dead-on-arrival.
Nakuha sa panimalay niini ang duha ka medium ug 24 ka ginagmayng pakete sa gituohang shabu.
Laing nakuha sa operatiba ang P10, 430 lakip na ang notebook nga adunay mga lista sa gituohang katransaksyon niini uban ang mga resibo sa mga remittances.
Nalakip si Macachor isip high value target level 2 sa watchlist sa MCPO.
Dead-on-arrival nga napadangat sab sa tambalanan ang laing suspek nga gihatagan og search warrant sa Centro Police Station.
Si Ranchie Castañeda, 33, giingong nibalik sa pagpamaligya sa iligal nga drugas, siya nakagawas sa prisuhan sa milabayng tuig nunot sa kalambigitan gihapon.
Nakuha gikan sa pakisusi sa Scene of the Crime Operatives (SOCO) ug Centro Police Station ang kalibre .45 nga armas nga may lima ka mga bala, tulo ka empty shells, usa ka slug, mga drug paraphernalia ug 10 ka mga gagmayng pinakete sa gituohang shabu.
Nadakpan sab sa MCPO- CIB si Clifford Alilin sa Upper Tabok, Mandaue nga adunay 55 ka gagmayng pakete sa shabu.
Laing nadakpan sa Subangdaku Police Station mao si Honorato Pitos ug si Orlie Ceniza sa pagpatuman og warrant sa Casuntingan Police Station.
Nakaikyas hinuon sa operasyon sa Opao Police Station si Jingle Parada kinsa nakuhaan og 10 ka pinakete sa gituohang shabu sa iyang panimalay.
Talisay
Si Talisay City acting chief of Police nagkanayon nga abli ang ilang buhatan sa imbistigasyon human nga napatay sa ilang kapulisan ang tulo ka mga suspek nga giingong ningsukol sa gipahigayon nga Oplan Silhig 2.
“We are very open to investigation, as always. Kasi it’s a legitimate operation naman,” matud pa niya.
Dugang pa niya nga di tuyo sa kapulisan nga patyon ang mga suspek.
Apan sa higayon nga mosukol kini, andam ang kapulisan nga moprotekta sa ilang kaugalingun.
“We have to defend ourselves. We have no other resort but to defend ourselves,”matod ni Superintendent Marlu Conag.
Carmen
Napatay si Quingco human giingong nakigpinusilay sa mga pulis atol sa buy bust operation kagahapon sa alas 12:30 sa kadlawon sa Brgy.Poblacion.
Si Quingco naa sa watchlist sa kapulisan.
Si PO2 Ralph Laurel, sa Carmen Police Station nga nahinabi sa Superbalita Cebu nagkanayon ang ilang kauban nga si PO2 Everet Capuyan maoy nagsilbing poseur buyer mipalit o usa ka pakite balor og P200.
Apan atol sa transaction nakabantay si Quingco nga pulis ang gika-transact, nibunot sa gidala niining ..38 revolver hinungdan nga napusilan. (AYB, GPL, JPP, AZLG, Jude Suhot)