Duwa karon
7:00 pm- Rain or Shine batok Ginebra
PAGGAWAS sa mga numero human sa quarter-finals, naapsan na ni San Miguel Beermen center JuneMar Fajardo ang pambatong forward sa Alaska Aces nga si Vic Manuel sa inilugay sa Best Player of the Conference award sa Philippine Basketball Association (PBA) Commissioner’s Cup.
Ning maong kalambuan, mihayag ang poruhan sa Sugbuanong higante alang sa ikalima niyang sunodsunod nga season MVP award.
Gumikan sa maayo niyang gipakitang mga duwa sa best-of-three quarter-finals series batok sa Talk N’ Text KaTropa, mingsaka ang statistical average points ni Fajardo gikan sa 36.8 ngadto sa 38.7.
Samtang ang statistical point ni Manuel igo lang misaka og gamay gikan sa 37.2 ngadto sa 37.58.
Alang sa season MVP award, mibiya na’g dako ang produkto sa University of Cebu (UC) Webmasters ug mirehistro na kini’g 29.6 Sps kumpara sa 25.3 SPs ni Stanley Pringle sa GlobalPort Batang Pier.
Sa inilugay sa season MVP gihapon, si Barangay Ginebra Gin Kings center/forward Japeth Aguilar naa sa ikatulo dala ang 23.6, ikaupat ang kauban ni Fajardo nga si Arwind Santos (23.4), ug ikalima ang laing Beerman nga si Alex Cabagnot (22.0).
Si Jason Perkins sa Phoenix Fuel Masters maoy nag-una sa Rookie of the Year race pinaagi sa 15.10 Sps, ikaduha si Raymar Jose sa Blackwater Elite (9.94) ug ikatulo si Robert Herndon sa Magnolia Ang Pambansang Manok Hotshots (9.09).
Ang No.1 rookie pick nga si Christian Standhardinger sa San Miguel wala na’y apil sa ROY award gumikan kay wala kini nakapakita og aksyon sa miaging Philippine Cup.
Wala na sab apil sa kuwenta ang ekplosibong No.2 rookie pick nga si Kiefer Ravena sa NLEX Road Warriors gumikan sa suspensyon nga nadawat niini sa FIBA.
Si Fajardo, kinsa lumad nga taga lungsod sa Pinamungajan, Cebu, nagsubay na sa tul-id nga dalan aron makalugnot sa panagtabla kauban sila si Mon Fernandez ug Alvin Patrimonio sa padaghanay og MVP awards.
Sila si Fernandez ug Patrimonio nakabira na sab og tag-upat ka MVP awards apan dili lang sunodsunod sama sa nahimo ni Fajardo.
Sa laing bahin, kombatihon sa Brgy. Ginebra ug Rain or Shine Elasto Painters karong gabii ang nauswag nga Game 2 sa ilang semi-finals series.
Kini nga duwa orihinal nga gikatakda niadtong Martes apan nauswag kini gumikan sa dili maayong panahon.
Puwede kining mauswag kini pagbalik kon magpabiling dili maayo ang panahon karong adlawa.
Ang PBA nakadesisyon nga iuswag sab ang Game 3 sa lain semi-finals series tali sa San Miguel ug Alaska kagahapon gumikan sa samang rason.
Ning maong series, nag-una ang San Miguel, 2-0, batok sa Alaska samtang sa laing series, nag-una ang Ginebra batok sa Rain or Shine, 1-0.
Ang Ginebra ningmakmak sa Rain or Shine, 109-89, sa Game 1 sa ilang series. (ESL)