GIPANGMAKMAK sa Portland TrailBlazers ang defending champions Los Angeles Lakers, 91-73, aron ilugon ang summer league title sa National Basketball Association (NBA) kagahapon sa Las Vegas.
Hinuon nakabaton og konsuwelo ang Lakers gumikan kay naangkon sa ilang sakop nga si Josh Hart ang summer league MVP award.
Angayan lang sab nga itunol kang Hart ang MVP award gumikan kay impresibo kini’g gipakita sa duha ka mga semana nga kompetisyon nga gibuwakan sa iyang team-record nga 37 puntos sa double overtime nga kadaugan sa Lakers batok sa Cleveland Cavaliers niadtong Martes.
Apan ning duwaa, nalimitahan lang sa 12 puntos si Hart gumikan kay na-ejected kini sa pagpanaway sa mga referee.
“I don’t go for individual accolades,” asoy ni Hart. “That’s never been a reason why I played this game. I play this game to win. That’s the biggest thing, I came here to win, I came here to dominate.”
Gikauban ni Hart sa MGM Resorts All-NBA Summer League First Team mao sila si Chicago Bulls forward Wendell Carter Jr., Knicks forward Kevin Knox, Cavaliers guard Collin Sexton ug Milwaukee Bucks center Christian Wood.
Naglangkob sa All-NBA Summer League Second Team mao sila si Phoenix Suns center Deandre Ayton, Trail Blazers guard Wade Baldwin IV, Memphis Grizzlies forward Jaren Jackson Jr., Lakers forward Sviatoslav Mykhailiuk ug Atlanta Hawks guard Trae Young.
Sa gipakita ni Hart sa torneyo, nakadawat siya og daghang pagdayeg hilabi na gikan kang lakers summer league coach Miles Simon.
“I really love Josh for that because he fought to continue to play cause he’s a competitor and he’s a winner and we’re trying to build a championship mentality throughout our organization and we talk about those things every day. And Josh embodied all those things over this time,” matod ni Simon.
Si Hart maoy saktong ehemplo sa magduduwa nga gipakita ni Lakers coach Luke Walton nga makatabang sa ilang bag-ong lider nga si LeBron James.
Hasta ang mga magduduwa sa TrailBlazers nakadayeg kang Hart.
“Josh is a phenomenal player, I have fun watching him grow from school, it’s amazing,” asoy ni KJ McDaniels, kinsa maoy nangulo sa TrailBlazers pinaagi sa iyang 17 puntos ug maoy napiling MVP sa finals.
“He did great leading his team every day. It’s always good going against the best guys in the league. He’s going to do great things with the Lakers.”
Si Hart wala nakatiwas sa miaging season gumikan kay naangol ang wa nga kamot niini.
Ang 6’5” shooting guard nagpakita na og saktong labok sa offseason human hingpit nga naalim ang angol niini ug malaumon ang Lakers nga dako kini’g ikatabang sa team sa umaabot nga regular season. (AP, ESL)