Super Sine: Thelma Chiong wa kaagwanta, mibakho, migawas sa sinehan

Chiong, Caparas. Ang magtiayong Thelma ug Dionesio Chiong uban ni director Carlo J. Caparas. atol sa premier showing sa “Jacqueline Comes Home.” Ang anak ni Caparas maoy direktor sa pelikula. (Rolando R. Morallo)
Chiong, Caparas. Ang magtiayong Thelma ug Dionesio Chiong uban ni director Carlo J. Caparas. atol sa premier showing sa “Jacqueline Comes Home.” Ang anak ni Caparas maoy direktor sa pelikula. (Rolando R. Morallo)

“MY God!” nilanog nga pulong ni Thelma Chiong uban sa pagbakho.

Gibati og kaluoy ang kadaghanan nga nakasaksi sa pagtiyabaw ug paggawas ni Mrs. Chiong human wala maagwanta sa grabeng torture ug rape scene sa iyang anak nga si Marijoy Chiong (gidala ni Donnalyn Bartolome) sa pelikulang “Jacqueline Comes Home” sa Viva Films ubos sa direksiyon ni Ysabelle Peach Caparas atol sa premier screening sa SM Cinema One niadtong Lunes sa gabii.

Ang “Jacqueline Comes Homes” maoy dakong istorya sa krimen nga naglambigit sa mga adunahang pamilya sa Sugbo niadtong 1997 bahin sa pagkidnap sa mga dalagang managsuon diin ang manghod nga si Marijoy napalgang patay na sa ubos nga bahin sa pangpang sa Tanauan, dakbayan sa Carcar. Apan, si Jacqueline (gidala ni Meg Imperial) padayong missing hangtod karon.

Gitumbok nga naghimo sa krimen nabilanggo sa National Penitentiary sa Muntinlupa human gihukman og “double life sentence” ni Judge Martin Ocampo.

Si Ocampo napalgang patay sulod sa lawak sa inilang hotel sa dakbayan sa Lapu-Lapu pipila ka buwan human nga nahukman niya ang kaso. Nigawas sa imbestigasyon nga naghikog ang huwes.

Ang pelikula wala magtuki bahin sa kaso apan nagpakita sa kalig-on sa inahan sa pagpangita og hustisya sa iyang mga anak ug ang hinayhinay sa pagdawat sa kamatuoran bahin sa dulom nga hitabo sa pamilya.

Sa wala pa magsugod ang pelikula, ang magtiayong Thelma ug Dionesio Chiong nahinabi sa Superbalita Cebu. Gipangutana ning tagsuwat nga gihatagan ba sila og higayon nga makatampo sa esena o nakakita ba sila sa wala pa ma-edit ang pelikula.

“Wala gyud, Dong. Nipirma lang ko sa pagtugot nga makuahan og pelikula. Pareha ta, karong taudtaod pa gyud ko makakita nini,” matod ni Mrs. Chiong, kinsa nipadayag og kalipay nga mapagawas ang ilang habig taliwala sa daghang pagdaut ug pasangil.

“Maayong masayod sila kon nauli ba gyud diay si Jacqueline,” dason ni Madam Chiong.

Ang magtiayon nipadayag nga naka-move on na sa panghitabo ug nakapasaylo na sa mga kriminal apan kinahanglan magsilbi sila sa tukmang silot sa balaud.

Sa pelikula, gawas nila ni Meg ug Donnalyn, nag-unang cast mao sila si Alma Moreno (Thelma Chiong) ug Joel Torre (Dionesio Chiong) , Ryan Eigenmann ug uban sa mga lokal nga talento .

PIpila sa negatibong komentaryo nakasentro sa tungatungang bahin sa pelikula sa pagbalhinbalhin sa mga karaang ug bag-ong esena nga makalibog labi na kon wala ka makasunod sa istorya ug ang pagbutang og subra nga imahinasyon nga nahimong kataw-anan.

Pang-award ang arte sa mga beteranong artista. Wala magtuki sa merito sa kaso. Klaro nga ang istorya nakatutok sa inahan. Nindot usab human dili matagna ang kataposan ug nitukma kini sa ulohan, ‘Jacqueline Come Homes.’

Hingpit nga nahigmata ang inahan nga dunay ubang anak nga angay atimanon labi na ang iyang kamanghorang anak nga babaye nga nasakitan na nga kanunay masaypan nga si Jacqueline ug nahimo ang rekonselasyon sa pamilya.

Sa pagsugod sa pelikula, emusyonal nang daan dihang si Direk Ysabelle Peach Caparas, anak ni Carlo J. Caparas napasalamat apan halos dili mahuman sa iyang pakigpulong dihang napuno sa emusyon ug nihilak tungod sa kadaghan sa tawo nga nitan-aw sa premier showing sa iyang unang pelikula isip direktor.

Ang rating sa tagsuwat: aprub!

Ang “Jacqueline Comes Home” gipasalida na sa mga senihan sa tibuok nasod sugod kagahapon.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph