KINING away nila sa “kanhi laos nga pulitiko” ug ni Land Transportation Office (LTO 7) Regional Director Victor Caindec morag mahulog sila nga mga bata nga walay buot. Nagpatas-anay lang sa ilang mga garbo. Ang resulta, ang publiko maoy nasakripisyo. Unsa ra man god ning ilang giawayan? Nagagumikan lang sa mga pagsaway sa ilang tagsa-tagsa nila ka mga opisina ug performance.
Unang misaway ang “kanhi laos nga pulitiko” sa LTO gumikan sa reklamo aning mga namalit og mga motorsiklo nga dugay kaayong ma-release ang registration. Balido baya ang maong reklamo kay tinuod dugay man kaayo ma-release ang registration. Kami diri sa estasyon sa dySS biktima niana. Nakapalit mig motor para sa among reporters. Puwerting dugaya na release ang registration. Unya ang dealer mobasol sa taga LTO nga maoy langayan.
Pero igo lang motubag si Caindec ug didto mi-init ang panagsungi sa mainstream ug social media. Makalingaw paminawon. Pero unsa may makuha sa mga Sugboanon ning maong away? Morag silag mga bata. Pilde ang maglagot. Gi-pull out sa ‘kanhi laos nga pulitiko’ ang mga traffic enforcers nga nadestino diha sa Mambaling area, nianang gitukod nga underpass.
Sulod sa duha ka adlaw puwerting yagaw sa dagan sa trapiko. Kay gusto niya ang ang taga LTO na ang modumala sa traffic. Apan gumikan sa grabeng pagsaway sa katawhan, na-usab sa iyang huna-huna ug iya ra usab nga gibalik. Ingon ana man gyud na siya. Mangginukdanon. Kon si Caindec ra ang iyang kontra, nganong apilon man ang publiko?
Pero nahibawo ba mo nga kining away nila sa ‘kanhi laos nga pulitiko’ ug Caindec, ‘proxy war’ ni? Ang nag-away ani mao si ‘kanhi laos nga pulitiko’ ug si Presidential Assistant for the Visayas Michael Dino. Kay kana si Caindec rekomendado nang Dino sa iyang posisyon. Mao na nga si Caindec isog kaayo nga makig-away sa mayor. Pero mas maayo sab nang suklan kanang yabag diha sa City Hall kay nagtuo siya nga siya na gyuy hawod. (bobbygnalzaro@gmail.com)