HUMAN moasumer si Presidente Rodrigo Duterte sa pagkapresidente niadtong 2016, nikalit og kusog ang mga operasyon sa kapulisan ug ubang mga ahensya batok sa ilegal nga drugas. Pagtuman kini sa iyang saad sa iyang pagkampanya nga iyang puhagon ang illegal drugs sud sa unom ka mga buwan.
Misulod na lang sa ikatulong tuig sa iyang termino si Duterte, wa pay timailhan nga mapuhag ang illegal drugs.
Dinhi sa Sugbo, sa usa ka termino ni Cebu City Mayor Tomas Osmeña mga kapin sa usa ka dekada na ang nakalabay, iyang gisuwayan pagpuhag ang drugas sa Barangay Pasil. Gipalibutan kini niya og mga pulis human sa mga raid.
Di sayon nga makagawas ug makasulod sa Barangay Pasil niadtong higayuna kay sitahon ang mga estranyo nga manganha sa mao nga barangay. Gibantayan ang entry ug exit points, apan nakalusot gihapon ang illegal drugs.
Dunay uban nga namalhin sa ilang ilegal nga operasyon.
Nahuman na lang sa iyang termino si Osmeña niadtong higayuna, ang suliran sa illegal drugs sa Pasil nagpadayon pa. Hangtod karon, kusog lang kini gihapon. Ang barangay usa sa mga dapit sa Cebu City nga taas og suliran sa illegal drugs.
Mabuhat kaha ni Duterte ang iyang gisaad sa iyang kampanya pagpuhag sa illegal drugs sa nasod?
Kon di niya ma-address ang duha ka labing dakong mga suliran sa nasod, ang kakabus ug kurapsyon, lisod puohon ang illegal drugs.
Kasagaran sa mga nalambigit sa illegal drugs, mao kadtong wa nay laing kapaingnan, tinubdan sa panginabuhi- ang pagpamaligya og shabu.
Kon magpadayon ang kurapsyon sa kapulisan ug diha bisan sa sanga sa hustisya, mosamot nga di kini mapuo.
Duna ray mopuli niadtong mga napatay, nadakpan ug niundang. Busa, mahuman na lang si Duterte sa iyang termino, buhi gihapon ang drugas.