GAGMAY nga mga sakayan sa kadagatan gipahimangnoan nga di una molawig gumikan sa presinsiya ni Bagyong Inday nga misulod na sa Philippine Area of Responsibility (PAR).
Samtang si Lapu-Lapu City Mayor Paz Radaza nakakita sa pangihanglan nga kanunayon ang pagpahinumdom sa mga boat operator ug crew nga magmatngon sa paglawig ilabi na nga dautan ang panahon.
Si Al Quiblat sa Philippine Atmospheric Geophysical Astronomical Services Administration (Pagasa) Mactan nipahibawo nga ang tropical depression Inday nahimutang sa 660 kilometros sa silangang bahin sa habagatang-silangan sa Basco, Batanes.
Ang maong bagyo adunay gikusgon sa hangin nga 55 kilometros matag takna duol sa sentro ug naglihok sa direksiyon nga kasadpan amihanang kasadpan sa nasud.
Apan bisan nga di kini direkta nga maka-apekto, gipakusog ni Inday ang hanging Habagat nga nagdala og uwan sa Luzon area, samtang hanginon ug baluron ang kadagatan sa Visayas area.
Dugang ni Quiblat nga gibana-bana nga ang balod sa kadagatan moabot sa tres metros hinungdan nga di luwas sa mga gagmayng panagatan.
“Kon lain gani ang panahon, di na lang mobiyahe,” matod ni Radaza may labot sa nahitabo sa M/Ba Sta. Rosa Princess sayo ning semanaha sa dihang nasudlan og tubig dagat ang passenger pumpboat nga modunggo na unta sa pantalan sa Sta. Rosa wharf, Olango island gumikan sa dagkong bawod.
Luwas ang tanang mga pasahero niini.
Naglaraw ang opisyal nga mobutang og personnel sa matag pantalan sa mainland Lapu-Lapu lakip na sa Olango nga maoy mosusi sa tanang pasahero nga magsul-ob og life vest.