Traffic enforcer sa Lapu-Lapu gipatay

TRAFFIC enforcer sa dakbayan sa Lapu-Lapu nga nagtuman sa iyang trabaho sa karsada sa G.Y. dela Serna, Barangay Poblacion ang gitumba sa wa pa mailhing mamumuno.

Dead-on-arrival si Edmund Boter, 56, sakop sa City Traffic Management System (CTMS) nga taga-Sityo Tabay Babao, Barangay Marigondon sa maong siyudad.

Base sa pasiunang imbestigasyon sa kapulisan nga niadtong Martes sa gabii naglakaw si Boter gikan sa iyang detailed area nga nahimutang sa atubangang bahin sa City Central Elementary School ug nipadulhog sa merkado aron sa pag-abag sa pagdumala sa trapiko sa dapit.

Samtang nagbaktas ang biktima duha ka lalake ang iyang nalabyan nga kalit lang mipusil sa enforcer og naigo sa ubos nga bahin sa iyang tuo nga mata.

Si P/SSupt. Rommel Cabagnot nagkanayon nga base sa ilang gihimong background investigation sa enforcer wa kini malambigit sa ilegal nga kalihokan.

Ang Investigation and Detection Management Branch nga gipangulohan ni P/Supt. Elaveo Marquez namahayag nga ilang susihon kon “job related” o “personal grudge” ang motibo sa nahitabo ni Boter.

Sigun sa saysay sa mga kauban sa trabaho sa biktima nga adunay gikaengkuwentro ang biktima nga motorista nga wa magsul-ob og helmet ug ang giingong laing duha ka tawo nga iyang nabadlongan nianang sayo sa buntag nga nangukay sa personal nga butang niadtong mga tawo nga mangatulog sa plaza.

Matud ni Marquez nga base sa CCTV nga gisubay sa mga imbestigador adunay duha ka suspek nga nagsul-ob og puti nga sweat shirt samtang ang kauban naka-hoodie.

Ang homicide section padayon pa nga misiksik sa mga private owned CCTV camera duol sa crime scene nga makaabag sa pag-ila sa mamumuno nga giingong igo lang nanglakaw human namusil. (Ma. Devorah Taneo, USJ-R Intern)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph