NIHIMO og crime scene investigation sa Brgy. Ermita, siyudad sa Sugbo ang mga tinugyanan sa National Bureau of Investigation (NBI) 7, inabagan usab sa usa ka forensic expert gikan sa NBI Central Office.
Kini aron masuta kon unsa ang tinud-anay nga nahitabo sa giingong anti-drug operation sa mga sakop sa Carbon Police Station nga niresulta sa kamatayon sa kwatro anyos nga bata nga si Balden Skyler Abatayo, kinsa naigo sa saag nga bala.
Una nang nidangop sa NBI 7 ang kabanay sa bata sa miaging semana sa tinguha nga ma-imbestigahan ang mga pulis sa Carbon nga nihimo sa operasyon.
Ang forensic expert sa NBI Central Office nga si Ligaya Banawan kauban ang mga taga-NBI7, pinanguluhan ni Assistanty regional director Dominador Cimafranca, nisusi sa panimalay sa pamilyang Abatayo.
Matod ni Cimafranca nga nihimo silag crime scene reconstruction ug reenactment sa mga nahitabo, base usab sa nakuhang impormasyon gikan sa mga saksi.
Sa laing bahin, ang medico-legal officer sa NBI7 nga si Dr. Rene Cam, miingon nga wala na gikinahanglan ang subling pagpa-autopsy sa patayng lawas ni Skyler sanglit nagtakdo ang trajectory sa entrance ug exit sa bala sa pagsukod nila didto sa crime scene.
Base sa gihimo nga crime scene investigation, mohimo ug report ang NBI ug isumitir kini sa ilang director alang usab sa dugang aksiyon nga himuon. (AZLG)