PITO lang sa 54 ka mga local government units (LGUs) sa lalawigan sa Sugbo ang adunay Local AIDS Council (LAC) kini base na usab sa datus sa usa ka foundation diin tumong niini mao ang mamahimong aktibo ang LAC sa tanang LGUs.
Sa labing uwahi nga datus sa Department of Health niadtong Pebrero ning tuiga, nagpabilin nga anaa sa top 3 ang Central Visayas nga adunay taas nga kaso sa HIV/AIDS.
Karong tuiga lang, sa buwan sa Pebrero adunay nadugang nga 86 ka bag-ong kaso sa HIV.
Hinungdan nga nagpabilin kini nga nag-unang prayoridad di lang sa gobyerno apan lakip na sa non-government organizations (NGOs).
Lakip sa aktibo ug aduna nay LAC mao ang dakbayan sa Sugbo, Carcar, Danao, Naga, Toledo, ug mga lungsod sa Minglanilla, Compostela ug mismo ang Cebu Provincial Government.
Matod ni Greggy Senados, ang media officer sa Bill & Melinda Gates Foundation. nga usa ang Sugbo nga napilian sa ilang foundation isip pilot area aron matukod ug mamahimong aktibo ang tagsa-tagsa ka mga LAC.
Dugang niini nga lakip sa pilot provinces mao ang Sugbo, Palawan, Albay, Benguet, ug Ifugao diin nakita nila nga taas ang kaso sa HIV/AIDS.
Tungod kay multi-sectoral kining LAC, mao kini ang usa sa nakitang hagit sa LGUs nga wa pa makaumol niini.
Gawas sa kasamtangan nga libreng tambal alang sa positibo sa HIV/AIDS ug libreng test sa mga treatment hubs sa gobyerno, mamahimo nga ang LAC mo-monitor, evaluate ang programa alang sa HIV/AIDS ug bisan ang STI.
Usa usab kini nga mahatagan og igong pagtagad ingon man pundo ang HIV/AIDS sa usa ka LGUs.
Dugang ni Senados nga unom ka tuig ang ilang programa nga nagsugod sila niadtong 2017.
Ang katukuran sa LAC subay kini sa Republic Act 3504 kun ang Philippine AIDS Prevention and Control Act ug sa Department of Interior and Local Government (DILG) Memorandum Circular 2013-09 kun ang Strengthening Local Responses Toward More Effective and Sustained Responded to HIV and AIDS. (HBL)