SECTIONS
Friday, October 19, 2018

Traffic enforcer sa Mandaue: pakpak!

USA ka traffic enforcer ug laing tulo ka mga kawani gikan sa Janitorial and Security Services Unit (JASSU) ang gipasidunggan ni Mandaue City Mayor Luigi Quisumbing human nga nakasikop ang enforcer sa chief of staff sa mayor nga nilapas og trapiko.

Ang mga kawani sa JASSU sa laing bahin, nakatabang pagsikop sa isnatser nga miatake sa usa ka pasahero sa jeep sa milabayng semana.

Ang enforcer nga nakadawat og P5,000 gikan sa personal nga panudlanan sa mayor giila nga si Camillo Cobarte, enforcer gikan sa Traffic Enforcement Agency of Mandaue (TEAM).

Niadtong Lunes sa gabii, nasikop ni Cobarte si Atty. Elaine Bathan nga ni-“disregard sa traffic lane” sa may Pacific Mall.

Sa dihang nahinabi sa Superbalita Cebu, si Bathan niingon nga wa siya mahibaw nga di maka-left turn dapit sa may Maayo Hotel paingon sa Pacific Mall.

Tuod man, gipara siya ni Cobarte tungod sa iyang kalapasan.

“Gikuha niya (Cobarte) ang license and when he saw, he was very apologetic. Of course, I told him to proceed issuing the ticket to me because I actually violated and disregarded the lane. It was a solid yellow line, di pa pwede mo-overtake and di ka pwede mo U-turn,” matod ni Bathan ning mantalaan.

Niadtong Martes, personal nga nibayad si Bathan sa iyang kalapasan sa City Treasurer’s Office.

Kagahapon sa buntag, si Cobarte personal nga niatubang ni Quisumbing uban sa iyang labaw nga si Glenn Antigua.

Kahinumduman nga ang mayor niadto daan nang nipasidaan sa mga enforcer nga way pilion sa pagpanakop bisan pa og iyang pamilya o paryente ang nakalapas sa balaod trapiko.

Si Quisumbing niingon nga kon makadakop og iyang paryente ang Team enforcer, makadawat kini og P10,000 nga ganti gikan kaniya samtang P5,000 alang niadtong mga department head o opisyal sa city hall.

“It was a lesson learned for me and it should be the lesson for everybody to follow and obey traffic rules and regulations in the city because nobody will be exempted from compliance and observance of traffic rules. And if you make any traffic regulations regardless of who you are, your status, then you will be cited with a ticket. And you will have to answer with your obligations,” padayag ni Bathan.

Sa samang okasyon gahapon, nakadawat sab og P10,00 gikan sa mayor ang tulo ka mga kawani sa JASSUE nga sila si Wendel Sustino, Oscar Naparate ug Restituto Reboquio.

Ang tulo nakasikop sa isnatser nga namiktima og babaye, nanglabni sa cellphone sa usa ka terminal sa mall sa dakbayan.

Kon wa pa si Sustino, di na unta pa mahuka pa ang cellphone ni Charwen Sumalinog niadtong Huwebes sa milabayng semana. (JPP)


VIEW COMMENTS