80 ka balay sa Cebu City maigo sa BRT

DI momenos 80 ka mga balay ang maapektohan sa umaabot nga implementasyon sa Bus Rapid Transit (BRT) sa dakbayan sa Sugbo.

Si Francisco “Bimbo” Fernandez, executive assistant to the mayor, nagkanayon nga nipadala sila og suwat ngadto sa World Bank aron mabalhin ang mga pamilya nga nagpuyo sa maong mga balay, kansang nahimutangan maagian sa BRT.

Sagad nagpuyo sa barangay Sambag 1 ug Mambaling diin posible silang ibalhin sa barangay Lorega sanglit posible nga magtukod ang WB og lima ka andana nga edepisyo para puy-an sa mga pamilyang apektado sa BRT.

Lakip sa gi-propose sa City Government ngadto sa WB mao ang paghatag og pundo para sa mga pamilya kansang income mawala gumikan sa pagguba unya sa ilang mga balay.

Gisuspenso

Apan posible nga malugwayan pa ang ilang pagpuyo sanglit adunay laraw si Secretary Arthur Tugade sa Department of Transportation nga suspensuhon ang implementasyon sanglit nagkinahanglan pa og dugang ug lawom nga pagtuon kansang proyekto nagkantidad og P53 bilyones.

Sa wa pa gianunsyo ni Tugade ang maong kasayuran didto sa Clark Pampanga, ang pangulo sa DOTr una rang nibutyag nga ang BRT systems makapasamot sa kahuot sa trapiko hilabi na sa mga karsada nga huot.

Si City Administrator Nigel Paul Villarete, kinsa maoy point person ni Mayor Tomas Osmeña sa BRT sa dakbayan, nagkanayon nga mahibaw-an ang hingpit nga desisyon may labot sa maong proyekto human sa National Economic Development Authority-Investment Coordination Committee (NEDA-ICC) meeting karong hinapos sa Hulyo.

Si Villarete nagkanayon nga 100 porsiyento siya sa kamahinungdanon sa BRT dinhi sa siyudad sanglit gipaubos kini sa pagtuon sa WB.

Matod pa sa City Administrator nga kon technicalities ang hinungdan sa pagkansela sa maong mga proyekto di siya makatuo sanglit niagi kini sa hustong proseso.

Kon mahinayon ang BRT sa dakbayan, manukad kini sa Barangay Bulacao, mosubay sa N. Bacalso avenue, moadto sa South Road Properties, balik sa sentro sa siyudad, subay sa Osmeña boulevard, dalan Escario, lahos ngadto sa Barangay Talamban diin mosubay sila sa duha ka lane diin ang BRT ra ang gitugotan nga makaagi.

Sa miaging buwan, ang BRT gitumbok nga tipik unta sa intermodal transporation dinhi sa Sugbo.

Ilakip kini sa monorail ug light transit nga mga transportasyon alang sa Metro Cebu.

Si Tugade nagpanagana kaniadto pa pagpatuman sa BRT sa gagmay nga mga karsada sa dakbayan sa Sugbo, kasagaran tagtulo ngadto sa upat ka lanes. (PAC)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph