NAKADAWAT og ganti ug pasidungog ang usa ka nars kinsa nitabang sa usa ka lalake nga nabanggaan og motorsiklo ubos sa Maguikay flyover, dakbayan sa Mandaue niadtong Martes sa kaadlawon.
Ang paghatag og first aid ni Shaneen Grace Duterte sa nabanggaan og motorsiklo nga si Reynald Roa nakuhaan og hulagway nga gi-post sa Facebook page sa TV Patrol Central Visayas.
Ang maong hulagway nag-viral sa social media.
Kagahapon, moabot na ngadto sa 19,000 ka reactions ang nakuha niini uban sa 7,100 shares ug halos 2,000 ka mga comments.
Daghan ang nakadayeg sa gibuhat ni Duterte, kinsa bag-o lang nahuman sa iyang shift niadtong tungura.
Kagahapon sa hapon, gipasidunggan ug gihatagan siya og ganti ni Mayor Luigi Quisumbing nga moabot sa P20,000 tungod sa maayong binuhatan.
Laing pasidungog ang nadawat ni Duterte gikan sa Konseho sa dakbayan atol sa sesyon niini kagahapon.
Usa ka floor resolution ang giduso ni Konsehal Nenita Layese nga gitanduan sa mga kauban niini sa Konseho nga nidayeg sa bayanihong gibuhat ni Duterte sa pagluwas sa kinabuhi ni Roa nga nabanggaan.
Giimbitar sab siya atol sa sesyon kagahapon sa hapon.