COMPOSTELA, ComVal Province -- Patay ang regional administrator sa Philippine Tribal Governance Administration human gipusil sa San Antonio Village, Barangay Maparat, alas 7:40 sa gabii, Miyerkules, Hulyo 18.
Ang biktima giila nga si Jerome Montano, 63, lumad nga taga Babadan, Bunawan, Agusan del Sur.
Basi sa report sa Compostela Municipal Police Station nga adunay us aka wala pa maila nga motorsiklo ang miabot sa maong dapit ug mipusil sa ulo sa biktima sa makausa.
Matod pa sa mga nakasaksi nga giingog babaye ang mipusil sa biktima samtang lalaki ang nagmaneho sa motorsiklo nga gigamit isip gate away vehicle.
Matod pa nga ang grupo sa biktima nangolekta og P500 isip registration fee dungan sa pasalig nga mohatag og trabaho nga dunay dakong suweldo.
Nasayran nga ang biktima usa ka buwan na nga mipuyo sa Phase 2, Block 51, Lot 23, San Antonio Village, Barangay Maparat sa nahisgutang lungsod.
Nakuha sa lugar nga nahitaboan sa krimen ang us aka balihis nga bala sa kalibre .45 nga pistol.
Ang patay'ng lawas sa biktima gihaya sa Funeraria de Alar sa Purok 2, Poblacion, Compostela.
Hangtud sa pagsuwat niining balita, wala pay matumbok ang kapolisan nga suspect sa pagpatay sa administrador ug nagpadayon ang ilang imbestigasyon. (Rockyben S. Catisay)