SECTIONS
Saturday, September 21, 2019

Editoryal: Tabangan ang awtoridad

GIPANGDAKOP sa Land Transportation Office sa Davao Region ang pipila ka mga public utility jeepney (PUJ) nga dunay rota nga Toril ning dakbayan sa Davao niadtong milabay nga adlaw.

Ang maong mga dyip giingong nagbaton og makina sa trak nga dahunog ang tingog ug paspas managan. Hinuon ang pagdakop kanila, di sa ilang pagkaskasero kon di tungod kay nagbaton sila og mga sound system.

Dugay na kaayo ni nga mulo sa katawhan kay halos mabungol na sila og pamati niining kusog kaayong mga sound system samtang magsakay sa maong mga dyip.

Inay nga makatagpilaw samtang naa sa biyahe pauli sa tagsa-tagsa nila nga destinasyon padulong sa Toril dili na hinuon tungod kay alingugngog kaayo ang sonata sa sakyanan.

Dunay uban pang drayber nga mao pay masuko nga di makadungog sa sulti sa mga pasahero kon manaug na kay siya mismo nabungol na sa iyang sonata.

Ubay-ubay sab ang nadakpan niadtong milabay nga adlaw kay gi-operasyonan man sa LTO.

Maayo unta og kanunayon ang pag-atang sa mga personahe sa LTO niining maong mga PUJ aron nga mawagtang na kining alingugngog kaayo nilang mga sound system.

Ang problema lang sab sa LTO kay seasonal ang ilang pagpanakop busa ubang mga drayber namihasa na, hinungdan nga nagpatuyang na lang.

Gawas sa mga sound system, mas maayo sab nga pakusgan sab ang pagpanako sa LTO sa mga kaskaserong drayber.

Di lang sa rotang Toril, iapil sab ang rotang Mintal ug Calinan, kay duna say pipila nga mga drayber dinhi nga gahi og ulo.

Kinahanglan ipatuman kon unsay naa sa balaod-trapiko aron nga mahapsay ug maayo ang biyahe sa mga pasahero.

Samtang awhagon sab nato ang mga pasahero nga motaho gilayon ngadto sa LTO o kaha sa kapolisan kon ugaling makasakay sila niining mga dyip nga kaskasero ug dunay saba kaayong sonata aron nga makatabang sab kini sa atong mga awtoridad.

Kay usahay, sila ra man sab ang bantayan niining pipila ka mga badlungon nga drayber.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph