SI VINCE Petdeo Cuajao sa Holy Child College of Davao (HCCD) motabang sa nasud human makigtigi sa 10th Asean Schools Games basketball competition ugmang adlawa didto sa Malaysia.
Ang 17 anyos, six-footer forward, midako gikan sa Midsayap, North Cotabato, ang mikumpleto sa 12-miyembro sa Philippine U18, diin gilangkuban sa National University (NU) Bullpups.
Kini ang ikaduhang sagunson ni Cuajao moduwa sa Asean School Games human mitabang alsa sa nasud nga makaplata og medalya sa Singapore niadtong milabay tuig.
Gawas niya, anaa sab sila kanhi HCCD guard Cyril Gonzales ug kanhi Davao Jones Academy big man Aaron Buensalida, kinsang miduwa karon sa NU, ang lakip sa Dabawenyos nga naa sa listahan.
Si Cuajao, sa Facebook interview miingon nga karong tuiga ang team posibleng makabulawan na.
"Kaya kaayo (mag gold) kay gwapo kaayo among bonding karon dili kagaya dati (We can win a gold because we have a better teamwork now than last time," matod niya.
Ang defending champion Thailand sulayan nga mapabilin ang titulo diin niaadtong milabay tuig duna sila rekord 4-0 samtang ang Pilipinas nakaplata sa rekord 3-1.
Ang mohari sa kompetisyon basehan sa kadaghan daug atol sa single-round robin eliminations.