DAKPAN ang usa ka lalaki nga giilang no.7 most wanted person niadtong Hulyo 17, mga alas 5:00 sa hapon didto sa Lower Lumbatin, Purok 2, Pugaan, dakbayan sa Iligan.
Sa hiniusanga operasyon sa El Salvador Police Station uban ang kapolisan sa Iligan City Police Office, MisOr Provincial Intelligence Branch ug uban nasikop si Michael Igloria, 36, residente sa susamang dapit ug usa ka mag-uuma.
Si SPO1 Jose Gabule ang chief investigator sa El Salvador Police Station nibutyag sa SunStar SuperBalita nga ang maong suspek didto na nagtago tago sa bukid sa siyudad sa Iligan apan lumad nga taga Amoros, El Salvador.
Sa Amoros giingong mipatay sa iyang silingan pinaagi sa pagtigbas niini niadtong tuig 2012 diin giingog kauban niini ang iyang duha ka igsuon nga daling nakasibat human sa pagpatay.
Nasikop kini niadtong Hulyo 17 human minaog kini gikan sa bukid tungod kay nanganak ang iyang asawa.
Gitug-an sa suspetsado nga dili na makita ang iyang mga igsuon human mapatay sa giyera sa Marawi sa miaging tuig.
Gidakop si Igloria pinasikad sa Warrant of arrest nga giisyu ni Judge Emmanuel Pasal.
Si Igloria unang nahimog top 1 sa most wanted sa siyudad sa El Salvador ug ika pito sa provincial level.
Nanawagan si Gabule sa pamilya sa nabiktima ni Igloria nga moreport sa ilang buhatan aron dili mabasura ang kaso nga gipasaka sa suspetsado kinsa nasayran nga wala na sa dapit.
Sa pagkakaron napriso na sa El Slavador City Jail ang suspetsado.