BUOT ni Misamis Oriental Governor Yevgeny Vincente Emano nga mas mapalig-on ang pinulongan nga bisaya hilabina kon anaa dinhi sa pulo sa Mindanao.
Matud ni Emano nga subo kaayo nga adunay mga tunghaan sa dakbayan sa Cagayan de Oro nga gamulta ngadto sa mga tinun-an kon masakpan nga nagbisaya.
Talagsaon ra kaayo nga usa ka bisaya ang nahimong presidente ug pipila sa mga gabinete ang mga bisaya nga kung mobisita dinhi sa lalawigan dili magkalisod ug sige tinagalog.
Gipasabot ni Bambi ang pag-atubang sa korte nga kinahanglan nga mag iningles gyod diin ang mga suspetsado maglisod pagtubag tungod sa maong pinulongan.
Ikaduha mao ang pagsaulog sa kasal diin maglisod ang ginikanan sa babaye nga gikasal pag abi-abi sa mga bisita kay maglisod sa paglitok sa pinulongang English.
Gilusad usab niini ang usa ka grupo nga Lubas sa Dagang Binisaya (LUDABI) nga hugpong sa mga pinulongan nga bisaya.
Iya kining gitukod tungod kay bisan sa ilang panagtapok daghan kanila ang mag iningles.