SA pag-epekto sa bag-ong minimum nga suhulan sa Central Visayas, hingusgan usab sa Department of Labor and Employment (Dole) ang paghimo og halapad nga productivity incentive training sa mga kompaniya sa rehiyon.
Gibutyag ni Dole 7 regional director Alvin Villamor, kinsa chairman usab sa Regional Tripartite Wages and Productivity Board (RTWPB) 7, nga kini maoy ilang gikampanya sa mga kompaniya agi og tabang.
Sugod sa Agusto 3, mahimo nang P386 ang minimum nga suhulan sa mga kompaniya nga naa sa Metro Cebu nga dunay 10 ka mga trabahante ug pataas kun Class A.
Samtang, P348 na ang bag-ong minimum nga sweldo sa mga mamumuo gawas sa Metro Cebu kun Class B, P338 sa mga siyudad ug lungsod sa Bohol ug Negros Oriental sa Class C ug P323 sa mga lungsod sa Siquijor ug sa mga lugar sa mga isla sa Camotes ug Bantayan kun Class D.
Alang sa mga kompaniya sa maong mga dapit nga dunay ubos sa 10 ka mga trabahante dugang P10 ang mapuno sa ilang minimum nga sweldo.
Ubos sa Wage Order No. 21, ang mga mamumuo sa sektor sa agrikultura, makadawat usab og P20 ngadto sa P52 ang usbaw sa Class A, PP10 ngadto sa P25 sa Class B, P10 sa Class ug P10 ngadto sa P25 sa Class D.
Ubos sa Class A ang mga siyudad sa Sugbo, Mandaue, Lapu-Lapu, Talisay, Carcar, Danao, ug Naga ug mga lungsod sa Consolacion, Cordova, Liloan, Compostela, Minglanilla, ug San Fernando.
Samtang sa Class B ang mga siyudad sa Bogo, Toledo ug ubang mga lungsod gawas sa Metro Cebu apan way labot sa mga isla sa Bantayan ug Camotes.
Ang Class mao ang mga siyudad ug mga lungsod sa Bohol ug Negros Oriental ug Class D ang mga lungsod sa Siquijor ug mga isla sa Bantayan ug Camotes.(SCG)