Gipagawas na sa FIBA Disciplinary Panel kagahapon ang ilang desisyon kabahin sa nahitabong karambola tali sa Gilas Pilipinas ug Australia Boomers atol sa FIBA Basketball World Cup 2019 Asian Qualifiers niadtong Hulyo 2 sa Philippine Arena sa Bocaue, Bulacan.
Ang FIBA, nga maoy basketball governing body sa kalibutan, mipahamtang og suspensyon sa 13 ka mga magduduwa ug duha ka coaches lakip na niini ang multa ug uban pang mga silot sa national federations sa duha ka mga nasod. Aduna sa’y officiating crew nga gipangsuspenso.
Human sa kagubot, ang FIBA naglusad dayon og disciplinary proceeding nga gipadangat ngadto sa ilang gipormang Disciplinary Panel.
Sa habig sa Gilas Pilipinas, 10 ka mga magduduwa ang gipangsuspenso apan managlahi ang gidaghanon sa mga duwa depende sa salaod nga nahimo.
Sila si Japeth Aguilar ug Matthew Wright gipahamtangan og tagsa ka duwa nga suspensyon, sila si Terence Romeo, Jayson Castro William, Andray Blatche ug Tory Rosario tag tulo ka mga duwa, sila si Roger Pogoy, Carl Cruz ug Jio Jalalon tag lima ka mga duwa samtang unom ka mga duwa ang gilabay ngadto kang Calvin Abueva.
Ang wala ra napahamtangan og silot sa habig sa Gilas Pilipinas mao sila si JuneMar Fajardo, Gabe Norwood, Baser Amer ug Allein Maliksi.
Ang assistant coach sa Gilas nga si Jong Uichico gipahamtangan og tulo ka mga duwa nga suspensyon samtang usa ka duwa ang gihatag ngadto kang headcoach Vincent ‘Chot’ Reyes ug gipamulta kini’g 10,000 Swiss francs o mga P530,000.
Ang Samahang Basketbol ng Pilipinas, Inc (SBP), nga maoy national federation sa Pilipinas gimanduan nga mo-host sa magsunod duha ka home games sa Gilas apan pinaagi sa closed door.
Gipahamtangan sab og dugang duha ka home games nga suspensyon ang Pilipinas nga moepekto sa magsunod tulo ka mga tuig. Ang SBP gipamulta og Swiss francs 250,000 o mga P13 million.
Sa habig sa Australia, tulo ka mga magduduwa ang gisuspenso ug kini mao sila si Chris Goulding (usa ka duwa), Thon Maker (tulo) ug Daniel Kickert (lima).
Gipamulta sab ang Australia og 100,000 Swiss francs.
Ang mga multa gamiton isip hinabang sa “Basketball for Good” social program nga gilusad sa International Basketball Foundation (IBF).
Ang mga referee nga nag-officiate sa duwa tangtangon na gikan sa FIBA Elite Program ug dili na i-nominate sa bisan unsang international competitions nga giila sa FIBA sulod sa usa ka tuig.
“Fiba wishes to emphasize that it condemns any form of violence, both on and off the court. Respect, sportsmanship and professionalism are expected from players, coaches, officials and all other stakeholders at every game. Moreover, host countries must ensure the highest standards of organizational conditions are in place to guarantee the safety and well-being of players and other participants at all times,” opisyal nga pamahayag sa FIBA.(ESL)